BJP News : निष्ठावंतांनी तोफ डागली; ‘भाजपचे पहिले कार्यालय सुरू केले, प्रतिकूल स्थितीतही पक्ष सोडला नाही अन्‌ आता आमचा बळी घेतला गेला’

Karad, 23 January : भाजपमध्ये गेली 15 वर्षे अनेक कार्यकर्त्यांनी प्रामाणिकपणे काम केले. मात्र, जिल्हा परिषद व पंचायत समितीसाठी उमेदवारी देताना निष्ठावंत कार्यकर्त्यांना डावलून स्थानिक आमदारांनी काँग्रेस, राष्ट्रवादी काँग्रेसमधील आयारामांना संधी दिली. त्यामुळे भाजपमधील जुने कार्यकर्ते अस्वस्थ झाले आहेत, अशी खंत उंब्रज जिल्हा परिषद गटातील इच्छुक उमेदवार ॲड. महादेव साळुंखे यांनी व्यक्त केली.

दरम्यान, भाजपकडून (BJP) तिकिटासाठी डावलण्यात आल्यानंतर अनेकांनी पर्याय शोधण्याचा प्रयत्न केला आहे. संघशिस्तीत वाढलेल्या कार्यकर्त्यांनी पक्षाचा आदेश म्हणून आयारामांचे काम करण्याचा निर्णय घेतल्याचे दिसून येते. आता त्याचा फटका भाजपला किती प्रमाणात बसतो, यासाठी सात फेब्रुवारीच्या मतमोजणीचा वाट पाहावी लागणार आहे.

भाजप पक्षाने उमेदवारी डावलल्याने माहिती देण्यासाठी आयोजित पत्रकार परिषदेत ते बोलत होते. दिनेश घाडगे, सुशांत इनामदार, शिवाजी भोसले, विवेक कुराडे यांच्यासह कार्यकर्ते उपस्थित होते. कऱ्हाड (Karad) उत्तर विधानसभा मतदारसंघातील स्थानिक आमदारांनी उमेदवारी नाकारल्यामुळे नाइलाजाने शिवसेनेच्या धनुष्यबाणावर जिल्हा परिषद निवडणूक लढवण्याचा निर्णय घेतल्याचे ॲड साळुंखे यांनी स्पष्ट केले.

ते म्हणाले, ‘‘कऱ्हाड उत्तरमध्ये भाजप पक्षवाढीसाठी रामकृष्ण वेताळ, दीपाली खोत, प्रमोद गायकवाड, नाना पिसाळ यांच्यासारख्या अनेक कार्यकर्त्यांनी मोलाचे योगदान दिले आहे. मात्र, या धडाडीच्या कार्यकर्त्यांनाही डावलले. आम्ही पद, सत्ता किंवा वैयक्तिक लाभासाठी काम केले नाही. केवळ पक्षचिन्ह आणि विचारधारेसाठी काम केले; पण जिल्हा परिषद आणि पंचायत समितीच्या निवडणुकीत आयारामांना संधी देत निष्ठावंत कार्यकर्त्यांचा बळी घेतला जात आहे.

भाजपसाठी २०१० पासून सातत्याने काम करत आहे. २०१२ ला जिल्हा परिषद निवडणूक लढवली. प्रतिकूल परिस्थितीतही पक्ष सोडला नाही. उंब्रजला तालुक्यातील भाजपचे पहिले कार्यालय सुरू केले. विरोधी सरकारच्या काळात रस्त्यावर उतरून आंदोलने केली. भाजपमधील अंतर्गत लोकशाही संपुष्टात आली आहे. सर्व अधिकार स्थानिक आमदारांकडे केंद्रित झाल्याने पक्षातील समन्वय व शिस्त ढासळली आहे, असेही महादेव साळुंखे यांनी स्पष्ट केले.