Chandrakant Patil : 'काळजी करू नका! महायुतीबाबत योग्यच निर्णय'; चंद्रकांतदादांचा स्वबळाबाबत सूचक इशारा

Pune News : स्थानिक स्वराज्य संस्थानच्या निवडणुका आता तोंडावर आल्या असून इच्छुकांसह राजकीय पक्ष तयारीला लागले आहेत. असातच पुण्यातील शहरी भागातील भाजपच्या कार्यकर्त्यांना आता युती नाही तर स्वबळाची मागणी केली आहे. यावरून आज झालेल्या पुण्यातील भाजपच्या पदाधिकाऱ्यांच्या बैठकीत जेष्ठ नेते मंत्री चंद्रकांत पाटील यांनी पदाधिकाऱ्यांना धीर न सोडण्याचा कानमंत्र देत स्वबळाबाबत सूचक इशारा दिला आहे. यामुळे पुण्यात आगामी स्थानिकच्या निवडणुकीत तिनही पक्ष महायुती म्हणून लढणार की भाजपच्या सूचक इशाऱ्याप्रमाणे स्वबळाचा नारा देणार अशा चर्चा आता सुरू झाल्या आहेत.

राज्याचे उच्च व तंत्रशिक्षण मंत्री चंद्रकांतदादा पाटील यांनी आज (ता.29) पुण्यातील कसबा विधानसभा मतदारसंघाचा प्रवास करत नवनियुक्त मंडल अध्यक्ष आणि पदाधिकाऱ्यांच्या भेटीगाठी घेतल्या. यानंतर येथील विष्णू कृपा कार्यालयात विधानसभा मतदारसंघातील सर्व पदाधिकाऱ्यांची बैठकही घेतली. यावेळी पदाधिकारी आणि कार्यकर्त्यांनी विधानसभा निवडणुकीप्रमाणे महापालिका निवडणुकीसाठी आतापासूनच तयारीला लागावे, असा कानमंत्र त्यांनी दिला. तसेच, मोर्चा आणि आघाडीची कार्यकारिणी लवकरात लवकर पूर्ण करण्याच्या सूचनाही चंद्रकांतदादा यांनी यावेळी दिल्या.

पाटील यांनी, विधानसभा निवडणुकीत भाजपच्या सर्व कार्यकर्त्यांनी ग्राऊंडवर उतरून काम केले. त्यामुळे ना-भूतो-ना भविष्य असा विजय मिळाला. आगामी महापालिका निवडणुकीत ही आपल्याला तसेच यश मिळवायचे आहे. त्यामुळे कार्यकर्त्यांनी आतापासूनच तयारीला लागावे, अशा सूचना दिल्या. यावेळी यावेळी आ. हेमंत रासने, भाजपा पुणे शहर अध्यक्ष धीरज घाटे, माजी नगरसेवक गणेश बिडकर, शैलेश टिळक, स्वरदा बापट, राघवेंद्रबापू मानकर, राजेंद्र काकडे, प्रमोद कोंढरे, दीपक पोटे यांच्या सह भाजपचे सर्व पदाधिकारी उपस्थित होते.

महापालिका निवडणुकीत महायुतीच्या जागा वाटपाबाबत वरिष्ठ योग्य तो निर्णय घेतील. कार्यकर्त्यांनी त्याची काळजी करु नये. आपल्याला मिळालेली जबाबदारी योग्य पार पाडावी, अशा सूचना ही त्यांनी यावेळी दिल्या.

तसेच, पावसाळ्याच्या पार्श्वभूमीवर कार्यकर्त्यांनी आपापल्या भागावर विशेष लक्ष केंद्रित करावे. पावसामुळे निर्माण होणाऱ्या समस्या सोडविण्यासाठी महापालिकेच्या आपत्ती व्यवस्थापन विभागाशी समन्वय ठेवावा. जेणेकरून, आणीबाणीच्या प्रसंगातून नागरिकांना बाहेर काढण्यासाठी त्याचा फायदा होईल, असेही चंद्रकांत पाटील यांनी सांगितले आहे.