Rohit Pawar Vs Jaykumar Gore : जयकुमार गोरेजी आपण आधीच उघडे पडलात....आहे का हिंमत? : रोहित पवारांचा पलटवार

1. रोहित पवार विरुद्ध जयकुमार गोरे वाद तीव्र:
   जमीन घोटाळ्याच्या मुद्द्यावरून आमदार रोहित पवार आणि पालकमंत्री जयकुमार गोरे यांच्यात जोरदार शाब्दिक चकमक रंगली आहे.

2. गोरेंचा टोला, पवारांचे प्रत्युत्तर:
   गोरेंनी "झाकली मूठ सव्वा लाखाची ठेवा" असा टोला लगावल्यानंतर, रोहित पवारांनी “आपण आधीच उघडे पडले आहात” असे प्रत्युत्तर दिले आणि थेट ओपन डिबेटचे आव्हान दिले.

3. वाद सोशल मीडियावर चिघळला:
   पवारांनी गोरेंच्या जमीन आणि शोषण प्रकरणातील न्यायालयीन टिप्पणींवरही निशाणा साधला, त्यामुळे हा वाद आणखी तापला आहे.

Solapur, 10 November : महायुती नेत्यांच्या जमीन घोटाळ्यावरून आमदार रोहित पवार यांनी मुख्यमंत्री देवेंद्र फडणवीस यांच्यावर शरसंधान साधले होते. त्याला उत्तर देताना सोलापूरचे पालकमंत्री जयकुमार गोरे यांनी ‘आपले जमीन घोटाळे निघाले तर कुठपर्यंत जातील याचा विचार करावा आणि झाकली मूठ सव्वा लाखाची ठेवावी’ असा टोला रोहित पवारांना लगावला होता. त्याला रोहित पवारांनी प्रत्युत्तर दिले आहे. ‘जयकुमार गोरेजी आपण आधीच ‘उघडे’ पडले आहात, त्यामुळे उघड्या लोकांच्या तोंडून झाकली मूठ अशा गप्पा शोभत नाहीत, असा इशारा पवारांनी दिला आहे.

अकलूज आणि सांगोला नगरपरिषदेची निवडणूक लढवू इच्छिणाऱ्यांच्या मुलाखती घेण्यासाठी पालकमंत्री गोरे हे आज सोलापूरच्या दौऱ्यावर आले आहेत. त्या दौऱ्यात माध्यमांशी बोलताना आमदार रोहित पवार यांनी केलेल्या टीकेबाबत विचारले असता, त्यांनी रोहित पवारांना (Rohit Pawar) जमीन घोटाळ्यावरून सुनावले आहे. त्यावरून आरोप-प्रत्यारोप सुरू झाले आहेत.

रोहित पवार यांनी आपल्या समाज माध्यमावरून मंत्री जयकुमार गोरे यांच्या टीकेला प्रत्युत्तर दिले आहे. त्यात त्यांनी म्हटले आहे की, मा. जयकुमार गोरेजी आपण आधीच ‘उघडे’ पडले आहात, त्यामुळे उघड्या लोकांच्या तोंडून ‘झाकली मूठ’ अशा गप्पा शोभत नाहीत...

सर्वोच्च न्यायालयाने भिसे जमीन प्रकरणात, तर उच्च न्यायालयाने शोषण प्रकरणात आपला जामीन फेटाळताना काय शेरे मारले होते, ते पुन्हा एकदा सांगू का? असेल हिंमत तर या समोर, ओपन डिबेट करूया.. स्थळ वेळ सगळं तुम्ही ठरवा...आहे का हिंमत? असा सवाल रोहित पवारांनी केला आहे.

जयकुमार गोरेंनी काय म्हटलं होतं?

रोहित पवार आपले जमीन घोटाळे काढले तर कुठपर्यंत जातील, याचा विचार करावा. झाकली मूठ सव्वा लाखाची ठेवा. रोज झोपण्याच्या अगोदर या गोष्टींचा शांतपणे विचार करून झोपा, असा गर्भित इशारा पालकमंत्री जयकुमार गोरे यांनी आमदार रोहित पवार यांना दिला होता. त्याला रोहित पवार यांनी आज समाज माध्यमाद्वारे उत्तर दिले आहे.

Q1: वाद कशावरून सुरू झाला?
A1: जमीन घोटाळ्याच्या आरोपांवरून रोहित पवार आणि जयकुमार गोरे यांच्यात वाद सुरू झाला.

Q2: जयकुमार गोरेंनी काय म्हटले?
A2: त्यांनी रोहित पवारांना “झाकली मूठ सव्वा लाखाची ठेवा” असा इशारा दिला.

Q3: रोहित पवारांनी काय प्रत्युत्तर दिले?
A3: त्यांनी गोरेंना “आपण आधीच उघडे पडले आहात” असे म्हणत ओपन डिबेटचे आव्हान दिले.

Q4: वाद कुठे अधिक रंगला?
A4: दोघांच्या सोशल मीडिया पोस्टमुळे हा वाद अधिक तीव्र झाला.