Kolhapur Mahayuti : अखेर महायुतीचा फॉर्म्युला ठरला? जागावाटपात अजितदादांच्या शिलेदाराने भाजप, शिवसेनेसह इच्छुकांना घाम फोडला

Kolhapur News, 28 Dec : महायुतीत जागावाटप संदर्भात मॅरेथॉन बैठका होऊनही अद्याप घोळ मिटत नसल्याने इच्छुकांचा जीव टांगणीला लागला होता. शनिवार दिवसभर महायुतीच्या गोटातून कोणतीच माहिती येत नसल्याने महायुती होणार की नाही? यासंदर्भात उलटसुलट चर्चा सुरू होत्या.

राष्ट्रवादीला समानधारक जागा मिळत नसल्याने वैद्यकीय शिक्षण मंत्री हसन मुश्रीफ यांची नाराजी कायम होती. अखेर मंत्री मुश्रीफांनी घटक पक्षाला घाम फोडत समानधारक जागा घेत तोडगा काढल्याची खात्रीलायक माहिती समोर आली आहे. महायुतीचा फॉर्म्युला ठरला असून भाजप ३५, शिवसेना ३२ आणि राष्ट्रवादी १४ जागा घेत असल्याची माहिती आहे.

आज उच्च आणि तंत्र शिक्षण मंत्री चंद्रकांत पाटील यांच्या बैठकीत शिक्कामोर्तब होणार आहे. दिवसभराच्या चर्चेच्या गुऱ्हाळनंतर जवळपास हा फॉर्म्युला निश्चित झाल्याचे सांगण्यात येते. रात्री उशिरापर्यंत पालकमंत्री प्रकाश आबिटकर यांच्यासोबत शिवसेनेच्या पदाधिकाऱ्यांची बैठक सुरू होती. महायुतीत राष्ट्रवादीला सर्वात कमी दोन अंकीसुद्धा जागा मिळत नसल्यामुळे नाराजी व्यक्त झाली होती.

यातून मार्ग काढण्यासाठी काल दिवसभरात मंत्री हसन मुश्रीफ यांच्यासह महायुतीतील नेत्यांच्या बैठका झाल्या. या बैठकीत राष्ट्रवादीला १४ जागा देण्याची तयारी दाखविण्यात आल्याचे समजते. भाजप मोठा भाऊ म्हणून त्यांना सर्वाधिक जागा देण्यात येणार आहेत, तर पालकमंत्री आणि शहराचे आमदार शिवसेनेचे आहेत, म्हणून त्यांना अधिक जागा दिल्या असून, उर्वरित जागांवर राष्ट्रवादीचा विचार झाल्याचेही सांगण्यात आले.

महायुतीतील गोंधळ संपणार नाही, अशी स्थिती असताना रात्री झालेल्या सामंजस्यावर पालकमंत्री प्रकाश आबिटकर यांच्या उपस्थितीत बैठक झाली. तेथे या फॉर्म्युल्याला समंती देण्यात आल्याचे विश्वसनीय वृत्त आहे. रविवारी प्रमुख नेत्यांच्या उपस्थितीत चर्चा होऊन यावर शिक्कामोर्तब होणार आहे. यासाठी मंत्री चंद्रकांत पाटील, प्रकाश आबिटकर, हसन मुश्रीफ, राज्य नियोजन मंडळाचे कार्याध्यक्ष आमदार राजेश क्षीरसागर, खासदार धनंजय महाडिक, आमदार अमल महाडिक यांची बैठक होणार असल्याचेही सांगण्यात आले.

दरम्यान, यादी जाहीर होण्यापूर्वीच आज खासदार आणि आमदारपुत्रांनी मुहूर्तावर उमेदवारी अर्ज दाखल केले आहेत. त्यांच्यासाठीचा पक्षाचा एबी फॉर्म उमेदवारी दाखल करण्याच्या शेवटच्या दिवशी दिला जाणार असल्याचेही समजते. दरम्यान, आज जागा वाटपाच्या अंतिम चर्चेसाठी मंत्री, हसन मुश्रीफ, आमदार अमल महाडिक आणि आमदार राजेश क्षीरसागर यांची जिल्हा मध्यवर्ती बँकेत बैठक झाली.

यामध्ये ज्या जागांवर अद्याप एकमत नाही, त्यासंदर्भात चर्चा करण्यात आली. भारतीय जनता पक्षाच्या कार्यालयात आज सर्वच इच्छुक कार्यकर्त्यांना अर्ज भरण्यास सांगितले होते. या ठिकाणी वकील बसवून त्यांच्याकडून उमेदवारी अर्ज भरून घेतला जात होता. अर्जातील दुरुस्तीही केली जात होती.