Mahayuti News : 'स्थानिक'च्या निवडणुकीआधी महायुतीत नियुक्त्यांसाठी बिगफाईट; नेत्यांची डोकेदुखी वाढली...

Kolhapur News : येत्या 23 जूनला कोल्हापूर जिल्ह्यातील ‘डीपीडीसी’ची बैठक होणार आहे. तत्पूर्वी सत्ता स्थापन होऊन सहा महिने झाले तरी कार्यकर्त्यांना या सत्तेचा लाभ अजून तरी मिळालेला नाही. विविध महामंडळ समित्यांवरील नियुक्ती रखडल्या आहेत. अशातच कोल्हापूर जिल्हा नियोजन समितीची निवड देखील रखडलेली आहे. 23 जून च्या बैठकीत या समितीची रचना होण्याची शक्यता आहे.

तत्पूर्वी, या समितीवर अनेक कार्यकर्त्यांचा दावा आहे. प्रत्येक खासदार, आमदारांना मर्जीतील आणि प्रामाणिक एकाच कार्यकर्त्याची निवड करता येणार आहे. उर्वरित सात सदस्यांमध्ये कोणत्या पक्षाचे कार्यकर्ते असणार यावरूनच महायुतीतील नेत्यांची डोकेदुखी वाढणार आहे.

कोल्हापूर जिल्ह्याचे पालकमंत्री म्हणून प्रकाश आबिटकर यांची नियुक्ती झाली. मात्र अजून जिल्हा नियोजन समिती वरील विशेष निमंत्रकांच्या नियुक्ती अजून झालेल्या नाहीत. विधानसभा निवडणुकीत अनेक नेत्यांनी आपल्या मर्जीतील आणि प्रमुख कार्यकर्त्यांना या समितीवरील सदस्यत्वचा वादा दिला आहे. त्यामुळे जिल्ह्यातील दहा आमदारांना प्रत्येकी एक नाव या विशेष निमंत्रकांच्या सदस्यासाठी द्यावे लागणार आहे. तर जिल्ह्यातील खासदारांना देखील एका कार्यकर्त्याचे नाव द्यावी लागणार आहे.

जवळपास 19 सदस्यांची नियुक्ती या जिल्हा नियोजन समितीच्या समितीवर होत असते. त्यातील 10 आमदार आणि दोन खासदारांसाठी प्रत्येकी एक जागा जाणार आहे. उर्वरित 7 जागांसाठी महायुतीतील तीन पक्षात मोठी स्पर्धा असणार आहे. त्यासाठी भाजप, राष्ट्रवादी, शिवसेना आणि आरपीआयने देखील दावा केला आहे.

आगामी स्थानिक स्वराज्य संस्थेच्या निवडणुकीच्या पार्श्वभूमीवर अनेक कार्यकर्ते पदाधिकारी इच्छुक आहेत. मात्र इच्छुकांमधीलच एकाला संधी देऊन महायुतीतील अनेक आमदार आणि खासदार स्थानिक स्वराज्य संस्थेच्या निवडणुकीतील दावेदार कमी करून स्पर्धा कमी करण्याचा प्रयत्न केला जाऊ शकतो. त्यामुळे निवडणुकांआधीच या समित्यांवर नियुक्त करण्याचा प्रयत्न नेत्यांचा असू शकतो.