BJP Strategy : आमदार धैर्यशील कदमांनी सांगितला भाजपचा 2029 चा प्लॅन : पराभूत उमेदवाराला 3 कोटी; वाई, पाटणमध्ये विशेष लक्ष...

Satara, 14 July : भारतीय जनता पक्षाकडून आगामी २०२९ च्या विधानसभा निवडणुकीची तयारी सुरू करण्यात आली आहे. त्यातूनच सातारा जिल्ह्यात मित्रपक्षाच्या मतदारसंघाचे पालकत्व आमदारांकडे देण्यात आले आहे. त्यातूनच विधान परिषदेचे नवनिर्वाचित आमदार धैर्यशील कदम यांनी पराभूत उमेदवारांनाही भाजप दोन ते तीन कोटींचा विकास निधी देणार असल्याची घोषणा केली आहे.

आमदार धैर्यशील कदम यांनी नुकतेच वाई येथे भाजप पदाधिकारी आणि कार्यकर्त्यांची बैठक घेतली. त्या बैठकीत कदम यांनी भाजपच्या २०२९ चा प्लॅनबाबत भाष्य केले. ते म्हणाले, भाजपचे प्रदेशाध्यक्ष रवींद्र चव्हाण यांनी वाई आणि पाटण विधानसभा मतदारसंघाच्या पालकत्वाची जबाबदारी माझ्याकडे दिली आहे.

ग्रामविकास मंत्री जयकुमार गोरे यांच्याकडे पूर्वी वाई आणि पाटण मतदारसंघाची जबाबदारी होती. आता आगामी निवडणुकीच्या पार्श्वभूमीवर प्रदेशाध्यक्ष रवींद्र चव्हाण यांनी नूतन आमदार धैर्यशील कदम यांच्याकडे दिली आहे. आगामी २०२९ ची विधानसभा निवडणूक भाजप या दोन मतदासंघातून लढवणार असल्याचेही कदम यांनी या वेळी सांगितले.

दरम्यान, नुकत्याच झालेल्या जिल्हा परिषद, नगरपालिका निवडणुकीत भाजपचा उमेदवार जिंकला असो अथवा पराभूत झाला असो, त्याला सुमारे दोन ते तीन कोटींचा विकास निधी देण्यात येईल. पक्षाकडे निधीसाठी येणाऱ्यांनी संघटनेचे कामही तितक्याच ताकदीने केले पाहिजे, असा आदेशही कदम यांनी दिला.​

शिवसेना-राष्ट्रवादीच्या भूमिकेकडे लक्ष

भारतीय जनता पक्षाच्या आक्रमक भूमिकेमुळे महायुतीमधील मित्रपक्ष असलेले राष्ट्रवादी काँग्रेस आणि शिवसेनेची भूमिका काय असणार, याची उत्सुकता आहे. कारण जिल्हा परिषद आणि पंचायत समिती निवडणुकीत मंत्री मकरंद पाटील आणि पालकमंत्री शंभूराज देसाई यांनी युती करत भाजपला चांगलेच जेरीस आणले होते. आता भाजपच्या मतदारसंघात आव्हान निर्माण करण्याच्या भूमिकेला ते कसे उत्तर देतात,याची उत्सुकता आहे.