Kolhapur News : दिवंगत आमदार पी.एन. पाटील यांचे सुपुत्र राहुल पाटील यांचा प्रवेश झाल्यानंतर कोल्हापूरमध्ये राष्ट्रवादी काँग्रेस अजून डबल धमाका करणार आहे. गोकुळ दूध संघाचे माजी अध्यक्ष अरुण डोंगळे यांचा राष्ट्रवादी काँग्रेस प्रवेशाचा मुहूर्त ठरला आहे. यासोबत हातकणंगले तालुक्यात मागील अनेक वर्षांपासून काँग्रेसला बळ देणारा मोठा गट राष्ट्रवादीत प्रवेश करणार असल्याची चर्चा आहे. या पक्षप्रवेशाबाबत कमालीची गुप्तता पाळण्यात आली आहे.
उपमुख्यमंत्री एकनाथ शिंदेंच्या अधिक जवळचे झालेले गोकुळचे माजी अध्यक्ष अरुण डोंगळे आता राष्ट्रवादी काँग्रेसमध्ये प्रवेश करणार आहेत. येत्या 5 सप्टेंबर रोजी उपमुख्यमंत्री अजित पवार यांच्या उपस्थितीत त्यांचा पक्ष प्रवेश होणार आहे. काही दिवसांपासून अरुण डोंगळे यांची उपस्थिती कधी शिवसेनेच्या स्टेजवर तर कधी राष्ट्रवादी काँग्रेसच्या स्टेजवर पाहायला मिळत आहे. ते शिवसेनेच्या संपर्कात असल्याची चर्चा होती.
दोन दिवसांपूर्वी झालेल्या राहुल पाटलांच्या राष्ट्रवादीच्या पक्षप्रवेशात उपमुख्यमंत्री अजित पवार यांच्यासोबत देखील डोंगळे स्टेजवर होते. आगामी स्थानिक स्वराज्य संस्था निवडणुक आणि आगामी गोकुळ दूध संघाच्या निवडणुकीच्या निमित्ताने पुन्हा एकदा मंत्र्यांशी सूत जमवण्याचे त्यांचे प्रयत्न सुरू आहेत.
विधानसभा निवडणुकीत महायुती म्हणून राधानगरी भुदरगड विधानसभा मतदारसंघातील शिवसेनेचे उमेदवार आणि पालकमंत्री प्रकाश आबिटकर यांच्या प्रचाराच्या माध्यमातून अरुण डोंगळे हे उपमुख्यमंत्री एकनाथ शिंदे यांच्या संपर्कात आले. हळूहळू शिवसेनेतील संपर्क वाढत गेला.
आबिटकर यांच्या आभार मेळाव्यात एकनाथ शिंदेंच्या उपस्थितीत अरुण डोंगळे यांचा वाढदिवस साजरा करण्यात आला. सातत्याने संपर्क वाढल्याने डोंगळे हे शिवसेनेत पक्ष प्रवेश करणार असल्याची चर्चा जोरात सुरू होती. स्थानिक स्वराज्य संस्थेच्या निवडणुकीत आपल्या पुत्राला राष्ट्रवादीचे युवा जिल्हाध्यक्ष अभिषेक डोंगळे यांना उमेदवारी देण्याची अट मंत्री मुश्रीफ यांच्याकडे ठेवून राजीनामा दिला.
पुढील वर्षी गोकुळ दूध संघाची पंचवार्षिक निवडणूक होणार आहे. मागील निवडणुकीत गोकुळमधील ज्येष्ठ नेते माजी अध्यक्ष विश्वास पाटील, माजी अध्यक्ष अरुण डोंगळे यांनी महाडिक गटाची साथ सोडली. पण आता राज्यात महायुतीचं सरकार आल्यानंतर सत्ता समीकरणे बदलली आहेत.
महायुतीमधील राष्ट्रवादी भाजप आणि शिवसेनेचे सर्वच आमदार पदाधिकारी गोकुळच्या निवडणुकीत महायुती म्हणून उतरणार आहेत. अशातच मंत्री मुश्रीफ यांच्याकडे या निवडणुकीतील नेतृत्व जाण्याची शक्यता आहे. त्यामुळे डोंगळे यांनी पुन्हा एकदा राष्ट्रवादीकडे आपला मोर्चा वळवला आहे.
सरकारनामाचे सदस्य व्हा
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read Latest Marathi Political News, Breaking Political News from Maharashtra, India, Pune & Mumbai at Sarkarnama. To Get Live Political Marathi News on Mobile, Download the Sarkarnama Mobile App for Android and IOS. सरकारनामा आता सर्व सोशल मीडिया प्लॅटफॉर्मवर. ताज्या राजकीय घडामोडींसाठी फेसबुक, ट्विटर, इन्स्टाग्राम, शेअर चॅट, टेलिग्रामवर आणि व्हॉट्सॲप आम्हाला फॉलो करा. तसेच, सरकारनामा यूट्यूब चॅनेलला आजच सबस्क्राइब करा.