Kolhapur Crime: धक्कादायक! 'आमदार राजेश क्षीरसागरांचा मला पाठिंबा, तुला ठार मारीन...'; कॉल रेकॉर्डिंग व्हायरल, कोल्हापुरात खळबळ

Kolhapur News : राज्य नियोजन मंडळाचे अध्यक्ष व शिवसेनेचे आमदार राजेश क्षीरसागर, माजी नगरसेवक उत्तम कोराने या दोघांचं नाव घेत संबंधित कार्यकर्त्यानं तरुणाला ठार मारण्याची धमकी दिल्याचा प्रकार घडला आहे. या प्रकरणाबाबत जुना राजवाडा पोलीस ठाण्यात गुन्हा नोंद झाला आहे.

वाशी नाका परिसरातील मंडळातील वर्चस्ववादातून जीवे मारण्याची धमकी दिल्याप्रकरणी मिलिंद मोहन वेसणेकर (रा. राजकपूर पुतळा परिसर) याच्यावर अदखलपात्र गुन्हा दाखल करण्यात आला. आमदार राजेश क्षीरसागर (Rajesh Kshirsagar), माजी नगरसेवक उत्तम कोराणे व भरत चव्हाण यांचा मला पाठिंबा असल्याचे सांगत वेसणेकर याने धमकावल्याचे अमित हिंदूराव पाटील (वय 34, शिवाजी पेठ) याने जुना राजवाडा पोलिस ठाण्यात दिलेल्या तक्रारीत म्हटले आहे.

पोलिसांनी सांगितले की, वाशी नाका परिसरातील शाह सैनिक तरुण मंडळातील पदाधिकाऱ्यांमध्ये चार वर्षांपूर्वी वाद झाला होता. यानंतर पुन्हा हा वाद उफाळून आला आहे. दोन दिवसांपूर्वी वेसणेकर याने अमित पाटील व रवी इंगवले यांच्याविरोधात तक्रार दिली होती, तर वेसणेकर याने गुरुवारी सकाळी सिद्धाळा गार्डन येथे आपल्याला अडवून आमदार क्षीरसागर, माजी नगरसेवक कोराणे व चव्हाण यांचा मला पाठिबा असल्याचे सांगत जीवे मारण्याची धमकी दिल्याचे तक्रारीत म्हटले आहे.

याप्रकरणी जुना राजवाडा पोलिसांकड़न वेसणेकर विरोधात अदखलपात्र गुन्हा (Crime) दाखल करण्यात आला. दरम्यान, या संपूर्ण प्रकरणानंतर अज्ञाताकडून ठाकरेंच्या शिवसेनेचे जिल्हाप्रमुख रवी किरण इंगवले यांची फोनवरून संभाषणाची कॉल रेकॉर्डिंग व्हायरल केली आहे.

या व्हायरल कॉलमध्ये संबंधित तरुणाला जिल्हाप्रमुख इंगवले यांच्याकडून आपला याच्याशी संबंध नसताना तू आपले नाव का घेतोस, अशी विचारणा या कॉलमध्ये केलेली दिसून येते. दरम्यान, इंगवले यांच्याशी संपर्क साधला असता निवडणुकीच्या तोंडावर मला प्रकरणात गुंतवण्याचा प्रयत्न विरोधकांकडून सुरू आहे,असा आरोप त्यांनी केला आहे.