Hasan Mushrif reaction: 'बंटी पाटील एकटा पडलो म्हटला की घोटाळा होतोय...', 'त्या' वक्त्यावर मुश्रीफांचा मिश्किल टोला

Kolhapur News : मी एकटा पडलेलो आहे. हे सतेज पाटलांचे विधान मी वाचले. हे सर्व जनरल निवडणुकीमध्ये ठीक आहे. असे बोलून त्यांना सहानुभूती मिळू शकेल. मात्र गोकुळ, विधान परिषदेच्या निवडणुकीत एकटा पडलोय म्हटले की घोटाळा होतोय. बहुतेक याचा पराभव होतोय म्हणून लोक जात नाहीत. सतेज पाटलांकडून ही अपेक्षा नाही. त्यांनी लढाई केली पाहिजे. मी विजय होणार, असे सांगितले पाहिजे.

गोकुळचे मतदार ठराविक आहेत ते फार हुशार आहेत. गोकुळ आणि विधान परिषदेला मी एकटा पडलोय असे म्हटल्यावर काही उपयोग होणार नाही. महाविकास आघाडी, महायुती आहे. सर्वजण आपापले पक्ष घेऊन लढणार, असल्याचा मिश्किल टोला मंत्री हसन मुश्रीफ यांनी लगावला.

कोल्हापुरातील शासकीय विश्रामगृह येथे ते प्रसार माध्यमांशी बोलत होते. पुढे मुश्रीफ (Hasan Mushrif) म्हणाले, प्रत्येक मंत्रिमंडळाच्या बैठकीत कोरोना संदर्भात आढावा असतो. आताचा नवीन व्हेरियंट आहे. तो जास्त गंभीर नाही. लोक ऍडमिट होत आहेत. बरे होऊन जात असल्याचे त्यांनी यावेळी स्पष्ट केले.

कोरोनाच्या नवीन व्हेरियंटचा केवळ वयस्कर नागरिकांना केवळ थोडी काळजी घेण्याची आवश्यकता आहे. कोरोनाचे वेगळे वॉर्ड करण्यासाठी सगळ्या रुग्णालय प्रशासनाला आदेश देण्यात आले आहेत अशी माहिती मंत्री मुश्रीफ यांनी यावेळी बोलताना दिली.

ठाकरे बंधू एकत्र यावेत, पवार एकत्र यावेत ही सर्वांची इच्छा आहे, मात्र याचा मुहूर्त कधी आहे हे फक्त नेतेमंडळींना माहिती आहे. यासंदर्भात आम्हाला कोणतेही माहिती मिळालेले नाही. योग्य वेळ आले की कळेल. एकत्र येण्याचा निर्णय वरिष्ठ नेतेमंडळी घेतील, असेही राष्ट्रवादी काँग्रेसचे (NCP) दोन गट एकत्र येण्यावर मंत्री मुश्रीफ यांनी प्रतिक्रिया दिली.