Dr. Shirish Valsangkar : डॉ. वळसंगकर आत्महत्येप्रकरणी शिवसेना नेत्याचा पोलिस अधिकाऱ्यावर गंभीर आरोप; म्हणाले, ‘सत्य लपविण्याचा...’

Solapur, 20 May : विख्यात मेंदूविकार तज्ज्ञ डॉ. शिरीष वळसंगकर यांच्या आत्महत्येला आज ३२ दिवस पूर्ण झाले आहेत. पण पोलिस अजूनही आत्महत्येच्या कारणांपर्यंत पोचू शकले नसल्याचे आतापर्यंतच्या तपासात दिसून येते. पोलिसांनी हॉस्पिटलची प्रशासकीय अधिकारी मनीषा मुसळे माने हिच्यावर तपासाचा रोख ठेवला असून सध्या ती न्यायालयीन कोठडीत आहे. मात्र ठोस कारण सापडत नसल्याने पाेलिसांच्या तपासाविषयी प्रश्न उपस्थित केले जात आहेत. या प्रकरणी शिवसेनेचे जिल्हाप्रमुख मनीष काळजे यांनी मोठा आरोप केला आहे.

डॉ. शिरीष वळसंगकर (Dr. Shirish Valsangkar) यांनी १८ एप्रिल रोजी राहत्या घरातील बाथरूमध्ये गोळ्या झाडून आत्महत्या केली. डॉक्टरांच्या खिशात सापडलेल्या सुसाईड नोटच्या आधारे हॉस्पिटलची प्रशासकीय अधिकारी मनीषा मुसळे माने हिला १९ एप्रिल रोजी अटक केली. तिला सुरुवातीला पाच दिवस पोलिस कोठडी, त्यानंतर चौदा दिवस न्यायालयीन कोठडी सुनावण्यात आली.

मुसळे माने हिला चौदा दिवसांच्या न्यायालयीन कोठडीनंतर दोन दिवसांची पोलिस कोठडी मिळाली होती, त्यानंतर पुन्हा १४ दिवसांची न्यायालयीन कोठडी मिळाली आहे. ती कोठडी २७ मेपर्यंत असणार आहे. मुसळे माने हिचा आर्थिक अंगाने पोलिस (Police) तपास करत आहेत. तिच्या खात्यात आढळलेल्या ७० लाख रुपयांच्या रक्कमेबाबत पोलिसांना संशय आहे. मनीषा मुसळे माने हिने ती रक्कम पगारातील, तसेच घर बांधणी आणि शेती घेण्यासाठी हातउसने घेतली होती. संबंधितांना ती परत दिली आहे, असे तिने वकिलाच्या मार्फत पोलिसांना सांगितले आहे. त्यामुळे मुसळे माने हिच्या चौकशी पोलिसांच्या हाती काही ठोस लागले नसल्याचे सांगितले जात आहे.

दुसरीकडे, डॉ. वळसंगकर यांनी आर्थिक कारणामुळे आत्महत्या केली नसून त्यांच्या आत्महत्येमागे गृहकलह आहे. त्या गृहकलहाला डॉक्टरांची सून डॉ शोनाली कारणीभूत आहे, असेही डॉक्टरांचे निकटवर्तीय खासगीत सांगत आहेत. मात्र पोलिसांनी त्या दिशेने अजून तपास केला आहे की नाही, याबाबत पुढे येऊ शकलेले नाही.

दरम्यान, महिनाभरानंतरही पोलिस डॉ. वळसंगकर यांच्या आत्महत्येच्या ठोस कारणांपर्यंत पोचू न शकल्याने सोलापूर शहरातील विविध घटकांमधून नाराजी व्यक्त केली जात आहे. शिवसेनेचे जिल्हाप्रमुख मनीष काळजे यांनी पोलिस अधिकाऱ्यांवर गंभीर आरोप केले आहेत. ते म्हणाले की, डॉ. शिरीष वळसंगकर यांच्या आत्महत्येची सीआयडीच्या मार्फत चौकशी करण्याची मागणी गृहमंत्र्यांकडे केली आहे. शिवसेनेतील वरिष्ठ पातळीवरूनही तसे आमचे प्रयत्न सुरू आहेत.

डॉ. वळसंगकर यांच्या आत्महत्या प्रकरणाचा तपास चुकीच्या दिशेने सुरू आहे. प्रसार माध्यमे आणि जनतेपासून या प्रकरणातील सत्य लपविण्याचा प्रयत्न होत आहे, असे दिसते. त्यामध्ये एक वरिष्ठ पोलिस अधिकारी सामील असल्याची चर्चा जनतेत आहे. त्याबाबतची तक्रार गृहराज्यमंत्र्यांकडे केली आहे. या प्रकरणाचा पोलिसांची भूमिका तपासण्याचे काम सीआयडी किंवी एसआयटीतर्फे करण्यात यावा, अशी मागणी शिंदे सेनेचे जिल्हाप्रमुख मनीष काळजे यांनी केली आहे.

दरम्यान, प्रहार जनशक्ती पक्षाचे शहराध्यक्ष अजित कुलकर्णी यांनीही मुख्यमंत्री देवेंद्र फडणवीस यांना पत्र पाठवून डॉ शिरीष वळसंगकर यांच्या आत्महत्या प्रकरणाचा तपास सीआयडीकडे देण्यात यावा, अशी मागणी केली आहे. त्यामुळे वळसंगकर प्रकरणात पोलिसांच्या कामकाजाबाबत नाराजी व्यक्त होत आहे.