Dr. Shirish Valsangkar : डॉ. शिरीष वळसंगकर हे ‘त्या’ मेलमुळे व्यथित होते; पंधरा दिवसांनंतरही पोलिसांना सापडेना ठोस पुरावा

Solapur, 03 May : विख्यात मेंदूविकार तज्ज्ञ डॉ शिरीष वळसंगकर यांच्या आत्महत्या प्रकरणाला पंधरा दिवस उलटूनही पोलिस ठोस कारणांपर्यंत पोचू शकलेले नाहीत. वळसंगकर हॉस्पिटलची प्रशासकीय अधिकारी मनीषा मुसळे-माने हिच्या पुढे तपास अजूनही जाऊ शकलेला नाही. पण, पोलिस मात्र चौकशीबाबत अत्यंत गोपीनयता पाळत आहेत. मुसळे-माने हिने केलेल्या ‘ई-मेल’मुळे डॉ. शिरीष वळसंगकर हे व्यथित होते, असे पोलिसांचे म्हणणे आहे.

डॉ. शिरीष वळसंगकर ( Dr. Shirish Valsangkar) यांनी 18 एप्रिल रोजी सायंकाळी स्वतःच्या घरी गोळ्या झाडून घेऊन आत्महत्या केली होती. त्यानंतर दुसऱ्या दिवशी 19 एप्रिल रोजी वळसंगकर हॉस्पिटलच्या प्रशासकीय अधिकारी मनीषा मुसळे माने हिला रात्री उशिरा अटक करण्यात आली होती. अटकेतील मुसळे माने हिला पहिल्यांदा तीन दिवसांची, तर दुसऱ्यांदा दोन दिवसांची पोलिस कोठडी मिळाली होती.

दरम्यान, डॉक्टरांच्या खिशात सापडलेल्या सुसाईड नोटच्या आधारे मनीषा मुसळे माने (Manisha Musale Mane) हिला अटक करण्यात आली आहे. त्या सुसाइड नोटमध्ये ‘मी ज्या माणसाला शिकवून आज ‘एओ’ (प्रशासकीय अधिकरी) केले आणि चांगला पगार देतो आहे, त्याने खोटारडे आणि घाणेरडे आरोप करून मला धमकावले. त्याचे मला अतीव दु:ख झाले आहे, म्हणून मी माझे जीवन संपवत आहे,’ असे लिहून त्याखाली शिरीष असे लिहिले आहे. त्या मजकुरात ‘एओ’ शब्दाच्या वर मुसळे असे नमूद केले होते.

मनीषा मुसळे माने हिची दिवसांची पोलिस कोठडी संपल्यानंतर हात काहीच लागत नसल्याने पाेलिसांनी तिच्या न्यायालयीन कोठडीची मागणी केली होती. पोलिस कोठडीचे अधिकार राखून ठेवून पोलिसांनी 14 दिवसांची न्यायालयीन कोठडीची मागणी केली हेाती. या चौदा दिवसांतील आठ दिवस संपले तरीही पोलिसांनी अजूनही मनीषा मुसळे माने हिला चौकशीसाठी कोठडीत बोलावले नाही, त्यामुळे पोलिसांच्या हाती नवे काही पडले नसल्याचे यावरून दिसून येते.

पोलिस कोठडीत घेऊन मनीषा मुसळे माने हिची अजूनही चौकशी झालेली नाही. नवे हाती काही सापडत नसल्याने पोलिस आता पुन्हा मनीषा मुसळे माने हिची न्यायालयीन कोठडी वाढवून घेण्याची तयारी पोलिसांनी सुरू केल्याचे सूत्रांनी सांगितले.

दरम्यान, मनीषा मुसळे माने ही 2008 पासून डॉ. वळसंगकर यांच्या रुग्णालयात काम करत होती. त्यांनी आपल्या ‘ई-मेल’वरून डॉ. शिरीष यांच्यासह त्यांची पत्नी डॉ. उमा, मुलगा डॉ. अश्विन यांना ‘आपणाकडून होत असलेल्या त्रासाच्या बाबतीत’ असा एक मेल केला होता. त्यामध्ये तिने आपले अधिकार कापले, पगार कमी केल्याने दोन्ही मुलांना मारून रुग्णालयात येऊन पेटवून घेणार, या सर्व प्रकाराला माझ्याबद्दल चुकीचे व खोटे पसरविलेले स्टाफमधील लोक आणि सर्व वळसंगकर कुटुंबीय जबाबदार राहतील, असा तिने मेल केला होता. तिच्या या खोट्या आरोपांमुळे डॉ. शिरीष वळसंगकर व्यथित झाले होते, असा पोलिसांचा दावा आहे.

तपास अधिकाऱ्याचे सखोल तपासाचे तुणतुणं

डॉ. शिरीष वळसंगकर आत्महत्या प्रकरणाच्या तपासासंदर्भात वरिष्ठ अधिकाऱ्यांना माहिती विचारल्यावर ते तपास अधिकाऱ्यांकडे बोट दाखवतात. तपास अधिकाऱ्यांना विचारले तर ते पहिल्या दिवसापासून आजपर्यंत ते ‘सखोल तपास सुरू आहे’ एवढंच तुणतुणं वाजवत आहेत.