Satara ZP Update : शिवसेना-राष्ट्रवादीचा पुन्हा गेम : सभापती निवडीत भाजपची बाजी, राष्ट्रवादीच्या दोन फुटीरांना लॉटरी

Satara, 04 April : सातारा जिल्हा परिषद अध्यक्ष, उपाध्यक्ष निवडीनंतर विषय समित्यांच्या सभापती निवडीतही भारतीय जनता पक्षाने बाजी मारली आहे. राष्ट्रवादीचे दोन सदस्य पुन्हा फुटले आहेत. भारतीय जनता पक्षाने राष्ट्रवादीतून फुटून आलेल्या लता कर्णे आणि ऋतुजा शिंदे यांना सभापतिपदाची बक्षिसी मिळाली आहे. कर्णे, शिंदे यांच्यासह ऋषीकेश धायगुडे-पाटील, तेजस्विनी विक्रमशील कदम या भाजपच्या चारही सभापतींची बिनविरोध निवड झाली आहे.

दुसरीकडे पोलिस प्रशासनाने आम्हाला सभागृहात वेळेवर पोचू दिले नाही, आम्हाला अर्ज भरता आले नाहीत, असा आरोप करत शिवसेना आणि राष्ट्रवादी काँग्रेसच्या (NCP) सदस्यांनी मतदानावर बहिष्कार टाकला, त्यामुळे चारही सभापतींची निवड बिनविरोध झाली आहे.

सभापती (Sabhaapti) निवडीच्या पार्श्वभूमीवर ऋतुजा शिंदे आणि आणखी एक सदस्य फुटल्याची कबुली राष्ट्रवादी काँग्रेसचे जिल्हा परिषद सदस्य अनिल देसाई यांनी दिली. तसेच, पोलिसांनी आम्हाला सभागृहात वेळेवर पोचू नये; म्हणून ठिकठिकाणी आमची अडवणूक केली. पोलिसांनी मेटल डिटेक्टरजवळ आम्हाला अर्धा तास अडवून ठेवले होते, असा आरोप शिंदे आणि संदीप मांडवे यांनी केला.

दरम्यान, जिल्हा परिषदेच्या उपाध्यक्षांकडे अर्थ व बांधकाम समितीचे सभापतिपद दिले जाते. त्यामुळे शिक्षण व आरोग्य, कृषी व पशुसंवर्धन, समाज कल्याण, महिला व बाल कल्याण या चार समित्यांच्या सभापतीपदासाठी भाजपकडून चारच उमेदवारी अर्ज आले होते. छाननीअंती कोणाताही अक्षेप नसल्याने चारही अर्ज वैध ठरल्याचे जिल्हाधिकारी संतोष पाटील यांनी जाहीर केले.

राष्ट्रवादी काँग्रेसमधून फुटून आलेल्या ऋतुजा विराज शिंदे यांनी महिला व बाल कल्याण सभापतिपद दिले असून ऋषीकेश धायगुडे-पाटील यांच्या समाज कल्याण सभापतिपद सोपविण्यात आलेले आहे. राष्ट्रवादीतून भाजपच्या गोटात दाखल झालेल्या लता अविनाश कर्णे आणि तेजस्विनी विक्रमशील कदम यांनी शिक्षण व आरोग्य, कृषी व पशुसंवर्धन यापैकी कोणते सभापतिपद मिळते, याकडे सर्वांचे लक्ष लागले आहे.

ऋतुजा शिंदे, ऋषीकेश धायगुडे-पाटील, लता कर्णे, तेजस्विनी कदम या चौघांचेच उमेदवारी अर्ज दाखल झाल्याने त्यांची बिनविरोध निवड जाहीर झाली आहे. त्याबाबतची घोषणा जिल्हाधिकारी संतोष पाटील यांनी केली.