Shivsena News : शिंदेसेनेच्या जिल्हाप्रमुखांची दबंगगिरी; गाडीची तोडफोड, पिता-पुत्राविरोधात गुन्हा दाखल

Solapur, 26 February : शिवसेनेच्या अल्पसंख्याक आघाडीचे जिल्हाप्रमुख मुश्ताक महिबूब शेख यांची दबंगगिरी पुढे आली आहे. बेगम पेठ पोलिस चौकीच्या पाठीमागे लावण्यात आलेल्या कारची तोडफोड शेख आणि त्याचा मुलगा जैद शेख यांनी केली आहे. यात कारचे मोठे नुकसान झाले आहे. गेल्या काही दिवसांपासून येथील अतिक्रमणाबाबत तक्रारी झाली होती. त्यातून हा प्रकार घडल्याचे सांगितले जात आहे.

दरम्यान, गाडीच्या तोडफोडप्रकरणी जेलरोड पोलिस ठाण्यात मुश्‍ताक महिबूब शेख आणि जैद मुश्‍ताक शेक (बेगम पेठ) या बाप लेकाविरोधात गुन्हा दाखल करण्यात आलेला आहे. याप्रकरणी अफसर हुसेनबाशा शेख (रा. बेगम पेठ) यांनी फिर्याद दिली आहे. या प्रकारामुळे सोलापूर शहरात (Solapur) एकच खळबळ उडाली आहे.

फिर्यादीनुसार, अफसर शेख यांनी त्यांच्या घरासमोर कार (एम एच १३, ईएस ८८८६) लावली होती. शेजारीच कार्यालय असल्याने शिवसेनेचा (Shivsena) पदाधिकारी मुश्‍ताक हा तेथे आला. कार तेथे का लावली, अशी विचारणा करत मुश्‍ताक याने त्याच्या जवळील पलंग ओढल्याने कारवर ओरखडे पडले.

मुश्ताक शेख याने कार्यालयातून आणलेल्या सळईने कारच्या मागच्या आणि पुढच्या काचा फोडल्या. त्यात कारचे ८० ते ९० हजारांचे नुकसान झाले आहे. तसेच, सळईने अफसर यांच्या पायावरही मारहाण केली. त्यात त्यांना दुखापत झाली आहे. जैद याने त्यांना शिवीगाळ करत मारण्याची धमकी दिली. त्यांचा मुलगा साकिब यालाही शिवीगाळ करत लाथाबुक्क्यांनी मारहाण केली.

दरम्यान, शिंदेसेनेच्या अल्पसंख्याक विभागाचे जिल्हाप्रमुख मुश्ताक शेख याचे या परिसरात कार्यालय आहे, त्या कार्यालयाच्या विरोधात स्थानिक नागरिकांनी तक्रारी केलेल्या आहेत. नागरिक आणि शेख यांच्यात मंगळवारी वादही झाला होता. या कार्यालयाच्या पाठीमागे राहणारे अफसर शेख यांनी पोलिस चौकीच्या पाठीमागे आपली नवीन गाडी उभी केली होती.