Shivsena UBT : मातोश्री अन् शिवसैनिकांना गृहीत धरू नका! जागांचा आकडा सांगत कोल्हापूरच्या जिल्हाप्रमुखांनी थोपटले दंड

Shivsena UBT : कोल्हापूर महापालिका निवडणुकीत महाविकास आघाडीतील नेत्यांनी 'मातोश्री'ला आणि मातोश्रीच्या शिवसैनिकांना गृहीत धरू नये. येणाऱ्या निवडणुकीत समन्वयाने मध्यमार्ग काढून जागा वाटपात अपेक्षित स्थान द्यावे. शिवसेना उद्धव बाळासाहेब ठाकरे यांच्या शिवसेनेचे जिथं प्राबल्य आहे, अशा ठिकाणी जागा मिळाव्यात. 81 पैकी 33 जागा शिवसेना उद्धव बाळासाहेब ठाकरे पक्षाच्या उमेदवारांसाठी मिळाव्यात, अन्यथा वरिष्ठांना कल्पना देवून स्वबळावर अन्यथा इतर पक्षांसोबत आघाडी करून महानगरपालिका निवडणूक लढवू अशा इशारा जिल्हाप्रमुख रविकिरण इंगवले यांनी पत्रकार परिषदेत दिला आहे.

लोकसभा निवडणुकीत महाविकास आघाडीत ही जागा शिवसेना उद्धव बाळासाहेब ठाकरे पक्षाकडे होती. मात्र काँग्रेसने ही जागा आपल्याकडे घेऊन त्या ठिकाणी श्रीमंत शाहू महाराज यांना उमेदवारी दिली. विधानसभा निवडणुकीत देखील आमच्याकडून जागा घेतली. लोकसभा आणि विधानसभा निवडणुकीला शिवसैनिकांनी पायाला भिंगरी बांधून प्रचार केला. मात्र नेहमीच ठाकरेच्या शिवसेनेला गृहीत धरण्यात आला आहे. केवळ निवडणुकीला आमचा उपयोग होत आला आहे.

महाविकास आघाडीतील आमदार, खासदारांकडे निधी मागितल्यावर आम्हाला निधी दिला जात नाही. महायुतीचे नेते आमच्या दारात येऊन नारळ फोडून जातात. त्यामुळे कार्यकर्त्यांकडून आम्हाला विचारणा होत आहे. त्यामुळे महानगरपालिका निवडणुकीत आम्हाला गृहीत धरू नका असा इशारा महाविकास आघाडीला दिला आहे.

मालोजीराजे आमचा फोन उचलत नाही.

लोकसभा आणि विधानसभा निवडणुकीत आम्ही आणि आमच्या शिवसैनिकांनी (Shivsena) दारोदार फिरून प्रचार केला आहे. मात्र आमच्या कामानिमित्ताने आम्ही मालोजीराजे छत्रपती यांना 50 फोन केले. त्यांनी आमचा एकही फोन रिसीव केला नाही. निवडणुका जवळ आल्या की रवी हे कर, रवी तिथे जा, असे निरोप येतात. मातोश्रीचा आदेश पाळत आम्ही ते काम करत राहतो. मात्र निवडणूक झाल्यानंतर महाविकास आघाडीतील नेत्यांकडून शिवसैनिकांना न्याय मिळत नसल्याची भूमिका जिल्हाप्रमुख रविकिरण इंगवले यांनी व्यक्त केली.