Shiv sena UBT : उद्धव ठाकरेंनी दिलेली जबाबदारी सोलापुरातील नेत्याने नाकारली; शिवसेनेतील बेदिली पुन्हा चव्हाट्यावर

1. सोलापूर महापालिका निवडणुकीच्या पार्श्वभूमीवर शिवसेना उद्धव बाळासाहेब ठाकरे पक्षातील अंतर्गत गटबाजी पुन्हा उफाळून आली आहे.

2. जिल्हाप्रमुख अजय दासरी आणि लोकसभा प्रमुख पुरुषोत्तम बरडे यांच्यातील वाद तीव्र झाला असून बरडेंनी मुख्य समन्वयकपद स्वीकारण्यास नकार दिला आहे.

3. या अंतर्गत संघर्षामुळे निवडणुकीत पक्षाला फटका बसण्याची शक्यता असून वाद मिटण्याची चिन्हे दिसत नाहीत.

Solapur, 22 December : महापालिका निवडणूक जाहीर झाल्या तरी शिवसेना उद्धव बाळासाहेब ठाकरे पक्षातील गटबाजी थांबण्याचे नाव घेत नाही. ऐन निवडणुकीच्या तोंडावर सोलापूर शिवसेना उद्धव बाळासाहेब ठाकरे पक्षातील मतभेद चव्हाट्यावर आले होते. जिल्हाप्रमुख अजय दासरी आणि सोलापूर लोकसभा मतदारसंघाचे प्रमुख पुरुषोत्तम बरडे यांच्यातील वाद उफाळला होता. त्यातच आता उद्धव ठाकरेंनी दिलेली सोलापूर महापालिका मुख्य समन्वयकपदाची जबाबदारी बरडे यांनी नाकारली आहे, त्यामुळे बरडेंच्या मनात नेमकं काय चाललंय, असा सवाल उपस्थित होत आहे.

जिल्हाप्रमुख अजय दासरी आणि लोकसभा प्रमुख पुरुषोत्तम बरडे (Purushottam Barde) यांच्यात गेल्या काही दिवसांपासून जोरदार वाद रंगला आहे. बरडेंच्या मुलांच्या पोस्टचा दाखला देत दासरी यांनी बरडे यांच्या पक्षनिष्ठेबाबत प्रश्न उपस्थित केले होते. बरडे यांनीही दासरी यांना प्रतिआव्हान देताना प्रभाग १३ मधून दासरी यांनी शिवसेनेचे दोन जरी नगरसेवक निवडून आणले तर आपण त्यांच्या गाडीवर चालक म्हणून काम करू, असे म्हटले होते, त्यामुळे ऐन महापालिका निवडणुकीच्या तोंडावर शिवसेनेत वाद उफाळला आहे.

दरम्यान, शिवसेनेचे (Shivsena) प्रभारी माजी खासदार चंद्रकांत खैरे यांनी या दोन्ही नेत्यांमधील वाद मिटविण्याचा प्रयत्न केला होता. मात्र, खैरेंनी बोलावलेल्या बैठकीला बरडेंनी दांडी मारली होती. त्यानंतर राज्यात महापालिका निवडणुका जाहीर झाल्या आहेत. त्यामुळे सर्वच राजकीय पक्षांकडून निवडणुकीची रणनीती आखली जात आहे. उमेदवारी ठरवले जात आहे. पण, ठाकरेंच्या सेनेतील रुसवे-फुगवे थांबायला तयार नाहीत.

सोलापूर महानगरपालिकेची निवडणूक जाहीर झाली आहे. त्या निवडणुकीसाठी उद्धव ठाकरे यांनी मुख्य समन्वयक म्हणून माजी जिल्हाप्रमुख पुरुषोत्तम बरडे यांची नियुक्ती करण्यात आली होती. मात्र, दासरी यांच्यासोबत असलेल्या वादामुळे त्यांनी पक्षप्रमुख उद्धव ठाकरे यांना पत्र पाठवून मुख्य समन्वयकपदातून मुक्त करण्यात यावे, अशी विनंती केली आहे, त्यामुळे ठाकरेंच्या शिवसेनेतील वाद काही केल्या मिटायला तयार नाही.

पुरुषोत्तम बरडे यांनी उद्वव ठाकरेंना लिहिलेल्या पत्रात म्हटले आहे की, सोलापूर महापालिका निवडणुकीसाठी आपण माझी मुख्य समन्वयक म्हणून १६ डिसेंबर रोजी नियुक्ती केली होती. गेल्या तीन दिवसांपासून आम्ही उपनेत्या अस्मिता गायकवाड, जिल्हाप्रमुख गणेश वानकर, संतोष पाटील, शहरप्रमुख दत्ता माने, महिला जिल्हा संघटक प्रिया बसवंती यांच्यासमवेत पक्षाच्या बैठका घेण्यात येत आहेत. कमी वेळ असल्याने महाविकास आघाडीतील पक्षांशी समन्वय साधून चर्चा केली जात आहे.

सोलापूर महापालिकेसाठी रणनीती ठरविली जात असताना जिल्हाप्रमुख अजय दासरी हे महाविकास आघाडीच्या बैठकीत आम्हाला पाहून काहीही न सांगता निघून गेले. तसेच त्यांनी आज (ता. २२ डिसेंबर) कोणालाही विश्वासात न घेता पत्रकार परिषद घेतली आहे. त्या पत्रकार परिषदेत दासरी यांनी ज्येष्ठ नेते चंद्रकांत खैरे आणि संपर्कप्रमुख अनिल कोकिळ यांच्यावर टीका केली आहे.

शिवसेना उद्धव बाळासाहेब ठाकरे पक्षाकडून निवडणूक लढविण्यासाठी असलेल्या इच्छुकांच्या मुलाखती आपल्या निवासस्थानी घेणार असल्याचे जाहीर केले आहे. सोलापूर महापालिका निवडणुकीचे सर्व रेकॉर्ड त्यांच्याकडे आहे. पण दासरी यांच्या अशा वागण्यामुळे महापालिका निवडणुकीत पक्षाला यश मिळणार नाही, असा दावाही बरडे यांनी पत्रात केला आहे.

जिल्हाप्रमुख अजय दासरी यांच्या अशा वागण्यामुळे मला सोलापूर महापालिका निवडणुकीच्या मुख्य समन्वयक पदातून मुक्त करावे. एक शिवसैनिक म्हणून मी आपले सर्व आदेश पाळण्यास तयार आहे, असे बरडे यांनी ठाकरे यांना लिहिलेल्या पत्रात म्हटले आहे.

1. सोलापूर शिवसेनेतील मुख्य वाद कोणामध्ये आहे?
   → जिल्हाप्रमुख अजय दासरी आणि लोकसभा प्रमुख पुरुषोत्तम बरडे यांच्यात.

2. पुरुषोत्तम बरडे यांनी कोणती जबाबदारी नाकारली?
   → सोलापूर महापालिका निवडणुकीच्या मुख्य समन्वयकपदाची.

3. बरडेंनी पद नाकारण्यामागचे कारण काय दिले?
   → अजय दासरी यांच्या वागणुकीमुळे निवडणुकीत यश मिळणार नाही, असे त्यांनी सांगितले.

4. या वादाचा संभाव्य परिणाम काय होऊ शकतो?
   → महापालिका निवडणुकीत शिवसेना उद्धव बाळासाहेब ठाकरे पक्षाचे नुकसान होऊ शकते.