Swarajya Sanghatana : स्वराज्य संघटनेच्या पदाधिकाऱ्यांची साताऱ्यातील आनेवाडी टोल नाक्यावर वादावादी!

Satara News : कोल्हापूरचे संभाजीराजे छत्रपती यांच्या स्वराज्य संघटनेच्या पदाधिकाऱ्यांची आनेवाडी टोलनाका व्यवस्थापनाशी शनिवारी सायंकाळी जोरदार वादावादी झाली. हा प्रकार सायंकाळी साडेसातच्या दरम्यान घडला. या वादावादी मुळे काही काळ तणावाचे वातावरण निर्माण झाले होते सुमारे अर्धा ते पाऊण तास येथील वाहतूक विस्कळीत झाली. येथील सर्व वाहने टोल शिवाय रवाना झाली. काही वेळ टोलनाका बंद ठेवण्यात आला होता.

कोल्हापूर जिल्ह्यामध्ये संपूर्ण कोल्हापुरवासीयांनी राजकीय एकी दाखवून कोल्हापूर टोलनाका बंद करून जुलमी अशा टोलपासून स्वतःची मुक्ती करून घेतली. सातारा जिल्ह्यात आनेवाडी टोलनाका बंद करण्यासाठी राजकीय इच्छाशक्ती असूनही ती दाखवली जात नाही. त्यामुळे वीस किलोमीटरच्या परिक्षेत्रातील सातारकरांना अजूनही टोल वसुलीचा जाच सोसावा लागत आहे, असे असतानाही सातारकरांकडून कोणतीही तीव्र प्रतिक्रिया आली नाही.

(राजकारणातील महत्त्वाच्या बातम्यांचे अपडेट्ससाठी सरकारनामाचे अधिकृत WhatsApp चॅनल फॉलो करा!)

मात्र शनिवारी कोल्हापूरचे संभाजीराजे छत्रपती यांच्या स्वराज्य संघटनेच्या पदाधिकाऱ्यांच्या सात ते आठ गाड्या एकाच वेळी टोल नाक्यावर आल्या. टोल देण्यावरून त्यांची टोल व्यवस्थापनाशी जोरदार वादावादी झाली. हा प्रकार सायंकाळी साडेसातच्या दरम्यान घडला टोल व्यवस्थापन व कर्मचारी यांच्या दरम्यान झालेल्या वादावादीमुळे तणावाचे वातावरण निर्माण झाले होते.

टोलनाक्याच्या दोन्ही बाजूला वाहनाच्या प्रचंड रांगा लागल्या स्वराज्य संघटनेच्या पदाधिकाऱ्यांनी टोल देणार नाही अशी भूमिका घेत व्यवस्थापनाला वाहतूक सुविधांच्या संदर्भात जाब विचारल्याची ही चर्चा आहे.

भुईंज पोलीस ठाण्याची पोलीस यंत्रणा घटनास्थळी पोहोचली होती मात्र वातावरणात तणाव कायम होता स्वराज्य संघटनेची सर्व वाहने टोल शिवाय रवाना झाली. काही काळ टोल नाका हा बंद करण्यात आला होता.

(Edited by - Mayur Ratnaparkhe)