RBI : 'RBI' चा मुंबईतील बँकेवर सर्जिकल स्ट्राईक! लादले कडक निर्बंध; ग्राहकांमध्ये खळबळ

RBI Restrictions News : नुकताच भारतीय रिझर्व्ह बँकेने ढासळत्या आर्थिक स्थितीमुळे मे महिन्यात सातारा जिल्ह्यातील सहकारी बँकेचा परवाना रद्द केला होता. यामुळे सहकार क्षेत्रातील बँकींग क्षेत्रात खळबळ उडाली होती. ही खळबळ अद्याप शांत झाली नसतानाच आरबीआयने पुन्हा एकदा एका सहकारी बँकेवर कडक निर्बंध लादले आहेत. यामुळे आरबीआयच्या कारवाईचा धडका सुरूच असल्याचे समोर आले असून मुंबईतील ग्राहकांमध्ये खळबळ उडाली आहे.

आरबीआयने 18 मे रोजी सातारा जिल्ह्यातील फलटण येथील द यशवंत सहकारी बँकेचा परवाना रद्द केला होता. तर कारवाई करत बँकेला सर्व बँकिंग व्यवहार थांबवण्याचे आदेशही दिले होते. तर बँकेकडे पुरेसे भांडवल आणि उत्पन्नाची साधने नसल्याचे कारण देत बँकेचे कामकाज सुरू ठेवल्यास ठेवीदारांचे हित धोक्यात येईल, असे आरबीआयने स्पष्टीकरण देत निर्णय घेतल्याचे सांगितले होते. तर ठेवीदारांचे पैसे परत करण्याची प्रक्रिया सुरू करण्यासाठी सहकार आयुक्तांना बँकेची नोंदणी रद्द करून लिक्विडेटर नेमण्याचे आदेश दिले होते.

या कारवाईमुळे राज्यातील सहकार क्षेत्रात एकच खळबळ उडाली होती. या कारवाईला अद्याप 1 महिनाही होत नाही तोच आरबीआयने ग्राहकांच्या हिताचा विचार करत मुंबईतील मोगावीरा सहकारी बँकेवर कडक निर्बंध लादले आहेत.

बँकेची आर्थिक स्थिती खालावल्याने बँकेवर अनेक निर्बंध लादले असून ते पुढील सहा महिन्यांसाठी असतील. तर या कालावधीत खातेदारांना जास्तीत जास्त 1 लाख रुपये काढण्याची परवानगी आरबीआयने दिली आहे.

आरबीआयने मोगावीरा सहकारी बँकेवर 12 जून रोजी कामकाज संपल्यानंतर हे निर्बंध लादले असून ते पुढील सहा महिन्यांसाठी आहेत. तर या कालवधीत आरबीआयकडून वेळोवेळी आढावा घेतला जाणार आहे. दरम्यान आता या निर्बंधांमुळे बँकेच्या व्यवहारावर मोठा परिणाम होण्याची शक्यता असून याचा खातेदारांना फटका बसणार आहे.

आरबीआयने लादलेल्या निर्बंधानुसार, बँकेला आता कोणतेही नवीन कर्ज मंजूर करता येणार नाही. सोबतच सध्याच्या कर्जाचे नूतनीकरणही करता येणार नाही. तर कोणत्याही प्रकारच्या गुंतवणुकीवर बंधन असणार असून कर्ज घेणे किंवा नवीन ठेवी स्वीकारण्यावरही बंदी असेल.