Sanjay Raut : संजय राऊतांच्या बंगल्याची रेकी प्रकरणात ट्विस्ट, पोलिस चौकशीनंतर 'ही' माहिती समोर

Sanjay Raut News : संजय राऊत यांच्या बंगल्याची रेकी करत असतानाचा सीसीटिव्ही फुटेज समोर आला होता. दुचाकीवरून राऊत यांच्या बंगाल्याची रेकी केली जात असल्याचे व्हिडिओमध्ये दिसत होते मात्र पोलिस तपासात वेगळीच माहिती समोर आली आहे.

संजय राऊत यांची बंगल्याची पाहणी करायला आलेले दोन बाईकस्वार हे रेकी करण्यासाठी आले नव्हते. ते बाईकस्वार एका मोबाोईल कंपनीचे नेटवर्क चेक करणारे कर्मचारी होते. नेटवर्क टेस्ट ड्राईव्ह करत असताना ते राऊत यांच्या बंगल्याजवळ गेल्याचे पोलिस तपासात समोर आले आहे.

संजय राऊत यांच्या बंगल्याची रेकी होत असल्याचा सीसीटिव्ही समोर आल्याने मोठी खळबळ उडाली होती. राऊत यांच्या सुरक्षेविषयी देखील चर्चा सुरू झाल्या होत्या. आदित्य ठाकरे यांनी तातडीने मुख्यमंत्री देवेंद्र फडणवीस यांची भेट घेत राऊत यांना सुरक्षा देण्याची मागणी केली होती.

राऊत हे देखील दिल्लीमधून मुंबईत दाखल झाले होते. घराच्या रेकी प्रकरणावर बोलताना त्यांनी पोलिसांवर विश्वास व्यक्त केला होता. ते म्हणाले होते आमच्या घरावर पाळत ठेवली जात आहे, हे आमच्यासाठी नवीन नाही. आम्हाला मारण्याचा प्रयत्न अनेकदा झाला आहे. माझा मुंबई पोलिसांवर विश्वास आहे. आमचे मुंबईचे पोलिस सक्षम आहेत.

एकनाथ शिंदेंच्या शिवसेनेचे नेते गुलाबराव पाटील यांनी संजय राऊत यांच्या घराची रेकी झाल्या प्रकरणात संशय व्यक्त करत राऊत यांनीच माणसं लावून हे काम केले असेल असा संशय व्यक्त केला होता. तर, विरोधी पक्षाच्या नेत्यांकडून राऊत यांच्या सुरक्षेविषयी चिंता व्यक्त करण्यात आली होती.

अखेर पोलिस तपासात राऊत यांच्या बंगलाची रेकी झाली नसल्याचे समोर आले. तसेच राऊत यांच्या बंगल्याजवळ बाईकवरून फिरणारे कोणी आरोपी नव्हे तर मोबाईल कंपनीचे कर्मचारी असल्याचे देखील पोलिसांकडून सांगण्यात आले.