Maharashtra Politics : एकनाथ शिंदे महायुतीची साथ सोडणार? शरद पवारांच्या 'त्या' वक्तव्यामुळे वेगळीच चर्चा

Eknath Shinde News : राष्ट्रवादी काँग्रेस शरदचंद्र पवार पक्षाचे अध्यक्ष शरद पवार हे विदर्भ दौऱ्यावर आहेत. मंडल यात्रेच्या निमित्ताने विदर्भातील ओबीसी मतदारांना साद घालण्याची तयारी राष्ट्रवादी काँग्रेस शरदचंद्र पवार पक्षाकडून केली जात आहे. मात्र, या यात्रेच्या आधी शरद पवारांनी एकनाथ शिंदेंविषयी केलेले वक्तव्य हे चर्चेचा विषय ठरले आहे.

पवारांनी एकनाथ शिंदेंच्या आगामी वाटचालीविषयी बोलताना म्हटले की, 'शिंदेंना खूप वर्षांपासून ओळखतो. त्यांचा एक स्वभाव आहे ते कधी बोलून दाखवत नाहीत. त्यांचा पुढची वाटचाल कशी असेल याचा अंदाज लवकरच येईल. '

एकनाथ शिंदे यांनी मागील काही दिवसांत तीनवेळा दिल्ली दौरा केला आहे. शिंदेंच्या दिल्ली दौऱ्याच्या पार्श्वभूमीवर पवारांनी केलेले वक्तव्य म्हणजे शिंदे हे महायुतीमधून बाहेर पडण्याची तयारी असल्याचे संकेत असल्याच्या चर्चा आहेत. महायुतीमध्ये मानसन्मान मिळत नाही तसे शिंदेंच्या मंत्र्यांची कोंडी केली जात असल्याने ते अस्वस्थ असल्याची देखील चर्चा होती.

एकनाथ शिंदे काय म्हणाले?

शरद पवारांच्या वक्तव्यानंतर एकनाथ शिंदे यांनी ठाणेमधील एका कार्यक्रमात प्रतिक्रिया देताना म्हटले की, शरद पवारसाहेब हे ज्येष्ठ आणि अनुभवी नेते आहेत. आमची वाटचाल ही बाळासाहेबांच्या विचारने आणि विचाराची आहे. मी दिल्ली गेलो तेव्हा कोणाला भेटले हे सगळ्यांनी पाहिले अमितभाई, पंतप्रधान नरेंद्र मोदी यांना भेटलो. आमची वाटचाल सरळ आहे कधी तिरकर जात नाही.

पवारांच्या 'त्या' वक्तव्यावर टीका

शरद पवारांनी आपल्याला दिल्लीत दोघे भेटले त्यांनी 160 जागा जिंकून देण्याची गॅरंटी दिली होती. आपण त्यांची राहुल गांधींची भेट घडवून आणली. आम्ही ठरवले की आपण या मार्गाने जायचे नाही. लोकांमध्ये जाऊन त्यांचा जो निर्णय असेल तो मान्य करू. पवारांच्या या वक्तव्यानंतर भाजपने त्यांच्यावर टीका केली आहे. भाजप आमदार प्रवीण दरेकर म्हणाले की, त्या लोकांची पोलिसांमध्ये तक्रार करायची होती किंवा इलेक्शन कमिशनकडे जायचे होते. तुम्ही त्यांना राहुल गांधींकडे घेऊन गेलात म्हणजे तुमचा नेमका हेतू काय होता?