Eknath Shinde Delhi visit : श्रीकांत शिंदेंना आयकर विभागाची नोटीस? एकनाथ शिंदेंनी अधिवेशन सोडून गाठली दिल्ली

Mumbai News : राज्यातील स्थानिक स्वराज्य संस्थेच्या निवडणुका तोंडावर आल्या आहेत. त्यामुळे येत्या काळात महायुती एकत्रित निवडणुका लढणार की स्वबळ अजमावणार याची उत्सुकता लागली आहे. त्यातच हिंदी सक्तीच्या मुद्द्यावरून ठाकरे बंधू एकत्रित आल्याने राज्यातील समीकरणे बदलणार आहेत. त्यामुळे राजकीय वातावरण ढवळून निघाले आहे. त्यातच मुंबई अधिवेशन सुरू असताना राज्याचे उपमुख्यमंत्री एकनाथ शिंदे हे बुधवारी रात्री अचानक दिल्लीत पोहोचले आहेत. खासदार श्रीकांत शिंदेंना आयकर विभागाची नोटीस प्राप्त झाल्याने एकनाथ शिंदे दिल्लीत गेले असल्याची चर्चा राजकीय वर्तुळात रंगली आहे. यावेळी शिंदे यांनी केंद्रीय गृहमंत्री अमित शाह व राष्ट्रीय सुरक्षा सल्लगार अजित डोवाल यांची भेट घेतल्याचे समजते.

राज्यात विधिमंडळाचे पावसाळी अधिवेशन सुरु आहे. त्यामुळे पुन्हा एकदा एकनाथ शिंदे नाराज असल्याच्या चर्चा सुरु झाल्या आहेत. त्यातच एकनाथ शिंदे बुधवारी रात्री अचानक दिल्लीत दाखल झाल्याची माहिती सूत्रांकडून मिळत आहे. शिंदे भाजपच्या ज्येष्ठ नेत्यांना भेटण्यासाठी दिल्लीत आल्याची माहिती आहे. मात्र या दौऱ्याचे अधिकृत कारण अद्याप समजलेले नाही.

महाराष्ट्राचे उपमुख्यमंत्री एकनाथ शिंदे यांचे चिरंजीव खासदार श्रीकांत शिंदे यांनाही आयकर विभागाने नोटीस पाठवली आहे, अशी माहिती सामाजिक न्याय मंत्री संजय शिरसाट यांनी दिली. या नोटिसीमध्ये 2019 ते 2024 या काळात संपत्तीमध्ये झालेल्या वाढीबाबत स्पष्टीकरण मागितले आहे. त्याचप्रमाणे संजय शिरसाट यांनाही उत्पन्न आणि मालमत्तेवरील वाढीबद्दल नोटीस मिळाली आहे. त्यामुळे एकनाथ शिंदे दिल्लीत दाखल झाले असल्याचे समजते मात्र, या वृत्ताला दुजोरा मिळू शकला नाही. दरम्यान, श्रीकांत शिंदे यांनाही आयकर विभागाने नोटीस पाठवली आहे, या विधानावरून काही वेळातच संजय शिरसाट यांनी घुमजाव करीत विधान मागे घेतले आहे.

एकनाथ शिंदे (Eknath shinde) यांचा दिल्ली दौरा नेमका कशासाठी आहे, असे प्रश्न उपस्थित होत आहेत. मात्र राज्यातील राजकीय घडामोडींवर शिंदे भाजपच्या वरिष्ठ नेत्यांशी चर्चा करणार असल्याचे समजते. बुधवारी रात्री दिल्लीत दाखल झालेले एकनाथ शिंदे हे गुरुवारी दुपारपर्यंत दिल्लीतच होते. यावेळी शिंदे यांनी केंद्रीय गृहमंत्री अमित शाह व अजित डोवाल यांची भेट घेतल्याचे समजते.

दरम्यान, येत्या काळात जर राज ठाकरे आणि उद्धव ठाकरे यांची जवळीक आणि आगामी निवडणुकीत युती झाल्यास याचा शिंदेंच्या शिवसेनेला (Shivsena) फटका बसण्याची शक्यता आहे. याशिवाय पक्षांतर्गत आमदार वेगवेगळ्या प्रकरणात टार्गेट केले जात आहेत. या मुद्द्यांवर चर्चा करण्यासाठी एकनाथ शिंदे दिल्लीत आल्याची माहिती मिळत आहे. त्यामुळे आता या सर्व विषयांवर काय चर्चा केली जाणार याकडे सर्वांचे लक्ष लागले आहे.

दरम्यान, अधिवेशन काळात एकनाथ शिंदे दिल्लीला गेले असल्याने चर्चेला उधाण आले असताना शिवसेनेचे मंत्री उदय सामंत यांनी विकास कामाबाबत चर्चा करण्यासाठी ते गेले असतील असे सांगितले. तर नाना पाटोले यांनी शिंदे यांच्या दिल्ली दौऱ्यावर टीका केली आहे.