Local Bodies Election : भाजप महाअधिवेशनातून 'स्थानिक'च्या निवडणुकीचा शंखनाद करणार

Mumbai News : मुख्यमंत्री देवेंद्र फडणवीस यांनी स्थानिक स्वराज्य संस्थांच्या निवडणुका पुढील तीन महिन्यात होतील, असे संकेत दिले आहेत. त्यादृष्टीने भाजपने नियोजनाला सुरवात केली असून 12 जानेवारीला शिर्डीत महाअधिवेशनाचे आयोजन करण्यात आले आहे.

या अधिवेशनाला गृहमंत्री अमित शाह, केंद्रीय मंत्री नितीन गडकरी, राष्ट्रीय अध्यक्ष जे.पी. नड्डा, मुख्यमंत्री देवेंद्र फडणवीस उपस्थित राहणार आहेत.

स्थानिक स्वराज्य संस्थांच्या निवडणूक प्रचाराचा शंखनाद या महाअधिवेशनातून करण्यात येणार असल्याचे संकेत प्रदेशाध्यक्ष चंद्रशेखर बावनकुळे यांनी दिली. शनिवारपासून भाजपची (BJP) सदस्य नोंदणी मोहीम सुरवात झाली. विधानसभा निवडणुकी अगोदर पुण्यातील बालेवाडी स्टेडियममधून रणशिंग फुंकण्यात आले होते. आता शिर्डीतून स्थानिक स्वराज्य संस्थांच्या प्रचाराचा शंखनाद होईल.

या महाअधिवेशनाला 15 हजारांहून अधिक पदाधिकारी आणि कार्यकर्ते उपस्थित राहतील. तालुका महामंत्रीदेखील या महाअधिवेशनाला बोलविण्यात आले आहेत. या महाअधिवेशनाच्या निमित्ताने शिर्डीतच (Shirdi) पक्षाची प्रदेश पदाधिकाऱ्यांची बैठक देखील होईल, अशी माहिती बावनकुळे यांनी दिली.

भाजपकडून 15 दिवस संघटन पर्व आयोजित करण्यात आले असून सदस्य नोंदणीवर भर देण्यात येईल. खासदार, आमदार, विधानपरिषद सदस्य व प्रमुख पदाधिकाऱ्यांना देण्यात आलेले टार्गेट पूर्ण झाले की नाही, याचा आढावा घेण्याची जबाबदारी माजी केंद्रीय राज्यमंत्री भागवत कराड यांच्यावर देण्यात आली आहे, असे बावनकुळे यांनी सांगितले.

दरम्यान, नागपूरमध्ये भाजप कार्यकर्त्यांच्या कार्यशाळा झाली. मुख्यमंत्री देवेंद्र फडणवीस यांनी यात कार्यकर्त्यांना कामाला लागा, असे सांगत येत्या तीन महिन्यात स्थानिक स्वराज्य संस्थांच्या निवडणुका होतील, असे संकेत दिले. गेल्या पावणेतीन वर्षांपासून स्थानिक स्वराज्य संस्थांच्या निवडणुका या रखडल्या आहेत. निवडणूक प्रकरण सध्या न्यायप्रविष्ट आहे. यावर 4 जानेवारी रोजी सुनावणी होण्याची शक्यता आहे.

स्थानिक स्वराज्य संस्थांच्या निवडणुका गेल्या अडीच वर्षांपासून रखडलेल्या आहेत. सर्वच राजकीय पक्षांनी आणि इच्छुकांनी निवडणुकांचा तयारी केली आहे. त्यामुळे या निवडणुकांचा बिगुल कधी वाजणार, याची उत्सुकता आहे.