Mumbai News : मुंबई महापालिका निवडणुकीची घोषणा लवकरच होण्याची शक्यता आहे. त्यामुळे सर्वच पक्षाकडून जोरदार तयारी सुरु आहे. या निवडणुकीसाठी महायुती एकत्रित निवडणूक लढणार हे जवळपास फायनल झाले आहे. दुसरीकडे मात्र, महाविकास आघाडीचे काहीच ठरले नाही. हिंदी सक्तीच्या मुद्द्यावरून राज-उद्धव ठाकरे एकत्र आले आहेत. त्यामुळे हे दोन बंधू एकत्रित निवडणूक लढण्याची शक्यता आहे. मनसे-उद्धव ठाकरेंची शिवसेना एकत्र आल्यास महाविकास आघाडीचे काय होणार याची उत्सुकता लागली असतानाच आता मोठी बातमी समोर येत आहे. मुंबई महापालिकेसाठी मनसे-उद्धव ठाकरेंच्या शिवसेना युतीच्या जागावाटपाचा फॉर्म्युला ठरला असून त्यावर शिक्कामोर्तब झाल्यास लवकरच युतीची घोषणा होण्याची शक्यता आहे.
वरळी येथील डोम कार्यालयात पार पडलेल्या मेळाव्याच्या निमित्ताने राज-उद्धव ठाकरे एकत्र आले. त्यानंतर विविध कार्यक्रमाच्या निमित्ताने त्यांच्यातील भेटीगाठी सुरु आहेत. त्यामुळे राजकीयदृष्ट्या दोघे कधी येणार याची उत्सुकता लागली असतानाच लवकरच ठाकरे बंधू एकत्रित मुंबई महापालिकेची निवडणूक एकत्र लढण्याची शक्यता आहे. सूत्रांच्या माहितीनुसार, मुंबईतील महानगरपालिका निवडणुकांसाठी उद्धव ठाकरेंची (Uddhav thackeray) शिवसेना आणि महाराष्ट्र नवनिर्माण सेना यांच्यातील जागावाटपाचा फॉर्म्युला अखेर ठरला आहे.
मनसे आणि शिवसेना या दोन पक्षाच्या नेत्यांमध्ये प्राथमिक स्वरूपाची चर्चा झाली असून त्यानुसार या दोन पक्षाच्या जागावाटपाचा फॉर्म्युला पुढे आला आहे. मनसे आणि उद्धव ठाकरेंची शिवसेना हे दोघेजण त्यांच्या बालेकिल्ल्यातील जागा समान वाटून घेणार आहेत. तर उर्वरित महानगरासाठी 60:40 चा फॉर्म्युला दोन्ही पक्ष स्वीकारण्याची शक्यता आहे, अशी सूत्रांची माहिती आहे.
ज्या मतदारसंघांमध्ये मराठीजनांचा प्रभाव अधिक आहे. त्या मतदारसंघांमध्ये दोन्ही पक्षांना समसमान जागा मिळणार आहेत. या मतदारसंघांमध्ये दादर-माहिम, लालबाग-परळ-शिवडी, विक्रोळी, दिंडोशी, घाटकोपर पश्चिम, दहिसर आणि भांडुप यासारख्या मतदारसंघांचा समावेश आहे. मराठी बहुल मतदारसंघांशिवाय अन्य मतदारसंघात मात्र जागा वाटप वेगळ्या पद्धतीने असेल.
उर्वरीत मुंबईत कोण किती जागा लढणार ?
मराठी बहुल भाग वगळता मुंबईच्या उर्वरित मतदारसंघांसाठीचा फॉर्म्युला वेगळा असणार आहे. या मतदारसंघांमध्ये शिवसेना (उद्धव बाळासाहेब ठाकरे) जास्त जागांवर लढणार आहे. ठाकरेंची शिवसेना 60 टक्के जागा लढेल तर मनसे 40 टक्के जागांवर आपले उमेदवार उभे करेल. हे दोन्ही फॉर्म्युला मिळून ठाकरेंची शिवसेना 227 मतदारसंघांपैकी 147 वॉर्डांमध्ये आपले उमेदवार उभे करेल तर राज ठाकरेंची मनसे 80 जागांवर निवडणूक लढवेल.
येत्या काळात होत असलेल्या निवडणुकीसाठी उद्धव ठाकरे आणि राज ठाकरे (Raj thackeray) यांची युती होणार हे आता जवळपास निश्चित झाले आहे. त्याची आता फक्त औपचारिक घोषणा होणे बाकी आहे. दरम्यान महापालिका निवडणुकीसाठी दोन्ही पक्षाच्या नेत्यांना जागांच्या यादी तयार करण्यास सांगण्यात आल्याची सूत्रांची माहिती आहे. त्यामुळे लवकरच कुठल्या जागा कोणाकडे राहणार याची चर्चा सुरु असल्याचे समजते.
सरकारनामाचे सदस्य व्हा
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read Latest Marathi Political News, Breaking Political News from Maharashtra, India, Pune & Mumbai at Sarkarnama. To Get Live Political Marathi News on Mobile, Download the Sarkarnama Mobile App for Android and IOS. सरकारनामा आता सर्व सोशल मीडिया प्लॅटफॉर्मवर. ताज्या राजकीय घडामोडींसाठी फेसबुक, ट्विटर, इन्स्टाग्राम, शेअर चॅट, टेलिग्रामवर आणि व्हॉट्सॲप आम्हाला फॉलो करा. तसेच, सरकारनामा यूट्यूब चॅनेलला आजच सबस्क्राइब करा.