Ajit Pawar praises Vivek Kolhe : आपल्या शिलेदारासमोरच अजितदादांकडून विवेक कोल्हेंचं कौतुक अन् राजकीय 'खसखस'!

Ajit Pawar Amit Shah event Ahilyanagar : उपमुख्यमंत्री अजित पवार यांनी आपल्या पक्षाचे आमदार आशुतोष काळे यांच्यासमोर त्यांचे प्रतिस्पर्धी भाजपचे युवा नेते विवेक कोल्हे यांचे कौतुक केले. 'जे तुमच्या मनात आहे, तेच अमित भाईंच्या मनात आहे,' हे जाहीर कार्यक्रमात सांगून टाकताच, विवेक कोल्हे यांच्या नावानं एकच जल्लोष झाला.

विशेष म्हणजे, व्यासपीठावर केंद्रीय मंत्री अमित शहा आणि मुख्यमंत्री देवेंद्र फडणवीस यांच्यासमवेत बसलेले विवेक कोल्हे यांच्या चेहऱ्यावर आनंद लपून राहिला नाही. व्यासपीठावरील आमदार आशुतोष काळे यांचा चेहरा मात्र काहीसा शांत, गंभीर असाच होता.

अहिल्यानगरच्या कोपरगाव इथल्या संजीवनी सहकारी साखर कारखान्यात विवेक कोल्हे यांच्या पुढाकारातून पहिला सीएनजी प्रकल्पाचं उद्घाटन केंद्रीय सहकार मंत्री अमित शहा (Amit Shah) यांच्या हस्ते झाले. मुख्यमंत्री देवेंद्र फडणवीस, उपमुख्यमंत्री एकनाथ शिंदे, उपमुख्यमंत्री अजित पवार, केंद्रीय सहकार राज्यमंत्री मुरलीधर मोहोळ, पालकमंत्री राधाकृष्ण विखे पाटील, आमदार आशुतोष काळे, माजी आमदार स्नेहलता कोल्हे, बिपीन कोल्हे यांच्यासह मंत्री उपस्थित होते.

अजित पवार (Ajit Pawar) भाषणाला उभे राहिल्यावर, त्यांनी विवेक कोल्हे यांनी केलेल्या स्वागत भाषणाचं कौतुक केलं. विवेक कोल्हे यांना भाषणाच्या शेवटी खास शैलीत धन्यवाद मानले. तोच धागा पकडून अजित पवार यांनी सहकारमहर्षी शंकरराव कोल्हे यांनी लावलेल्या संजीवनीच्या रोपट्याचं त्यांच्या परिवारानं वटवृक्षात रूपांतर केलं. त्यांच कार्य बिपीन कोल्हे यांनी पुढ नेलं. कोल्हे यांच्या सुनबाई स्नेहलता यांनी देखील ते कार्य पुढं वाढवलं. विवेक कोल्हे देखील चांगल्याप्रकारे काम चालवलं आहे. विवेक भाषणात म्हणत होता, धन्यवाद! मी आता म्हणतो, मी जे म्हणणार आहे, त्याच्यानंतर तुम्ही म्हणा धन्यवाद! यावर 'विवेकने उत्कृष्ट भाषण केलं', असा अजित पवार यांनी आवाज दिला. त्याचवेळी कार्यक्रमस्थळी समोर बसलेल्या जमावानं 'धन्यवाद', अशी जोरदार घोषणा दिली.

धन्यवाद दिल्यानंतर अजितदादानं गंमतीचा हा भाग जाऊ द्या, असे म्हणत राज्यातील सहकार चळवळीला खूप मोठा इतिहास आहे. देशात सर्वाधिक सहकारी तत्त्वावर कोणी जास्त प्रयोग केले असतील, प्रोडक्ट तयार केले असतील, तर ते सहकारमहर्षी शंकरराव कोल्हे सहकारी साखर कारखाने केले आहेत, असे अजित पवार यांनी म्हटले.

संजीवनी ग्रुपचे अजितदादांकडून धन्यवाद

'विधानसभा निवडणुकीत, देवेंद्र फडणवीस आणि एकनाथ शिंदेंबरोबर महायुतीचं काम करत होतो. अनेक ठिकाणी ताकदीचं लोकं होती. काही ठिकाणी दोघं-दोघं असल्यानं एकाला थांबावं लागलं. कोपरगावची जागी आमच्याकडे आली, आम्ही आशुतोषला उमेदवारी दिली. त्यावेळी मनामध्ये कोणताही किंतू न ठेवता संजीवनी ग्रुपने, मनापासून महायुतीचे कामं केलं. त्याबद्दल तुम्हाला सगळ्यांना लाख लाख धन्यवाद देतो, तुमचे लाख लाख आभार मानतो,' असे म्हणत अजित पवार यांनी व्यासपीठावरून सर्वांना हात जोडले.

...तेच अमितभाईंच्या मनात!

अजित पवार यांनी विवेक कोल्हे यांच्या राजकीय पुनर्वसनावर बोलताना सूचक विधान केलं. विशेष म्हणजे, यावेळी त्यांचे शिलेदार आमदार आशुतोष काळे व्यासपीठावर होते. अजित पवार यांनी, आम्ही अमितभाईंबरोबर कोपरगावला गाडीतून प्रवास करत येत होतो, अमितभाईंशी विवेक कोल्हेंच्या राजकीय पुनर्वसनावर चर्चा झाली. 'जे तुमच्या मनात आहे, तेच अमितभाईंच्या मनात आहे', एवढं इथं सांगतो, यापेक्षा मी जास्त काही बोलत नाही, असे सांगताच व्यासपीठासमोरील गर्दीनं टाळ्यांचा कडकडाट केला. जोरदार शिट्या वाजवल्या, घोषणाबाजीनं माहोल तयार केला. यावेळी अमितभाईंसह व्यासपीठावरील सर्वच राजकीय नेत्यांच्या चेहऱ्यावर हसू उमटलं होतं.