Ashok Kharat Case: कोर्टात 7 मिनिटात काय घडलं? SIT खरातचा फिरवणार गेम; 'प्लॅन बी' तयार

Ashok Kharat case twist: बोगस अध्यात्मिक गुरु अशोक खरात यांची पोलिस कोठडी आज संपल्यानंतर त्याला नाशिकच्या सत्र न्यायालयात हजर करण्यात आले. सुनावणीनंतर त्याला न्यायालयीन कोठडी ठेवण्याचा निर्णय न्यायालयाने दिला. सात मिनिटाच्या सुनावणीनंतर खरातची रवानगी कारागृहात करण्यात आली आहे.

यापूर्वी खरातला तीन वेळा पोलीस कोठडी सुनावण्यात आली होती, आजही पोलिस त्यांच्या कोठडीची मागणी करतील असे वाटत होते, पण पोलिसांनी न्यायालयात कोठडीची मागणी केली नाही, फक्त सात मिनिटात सुनावणी झाली. कोर्टात आज कुठलाही मोठा युक्तिवाद झाला नाही.

न्यायालयाने या प्रकरणातील गांभीर्य लक्षात घेता खरातला १४ दिवसांची न्यायालयीन कोठडी सुनावली आहे. खरात जरी पोलिस कोठडीतून न्यायालयीन कोठडीत गेला असला तरी त्यांच्या अडचणी सुटलेल्या नाहीत, कारण एसआयटीने पुन्हा त्यांच्या अटकेसाठी प्लॅन केला आहे.

आजची रात्र खरात जेलमध्ये असेल, पण उद्या त्यांची रवानगी पुन्हा पोलिस कोठडीत होण्याची शक्यता आहे. कारण पोलिस त्याला दुसऱ्या गुन्हा अडकणार असल्याचे समजते. त्यासाठी पोलिसांनी तयारी पूर्ण केली आहे. खरात याची पुन्हा चौकशी करण्यासाठी पोलिसांनी कंबर कसली आहे.

उद्या (२ एप्रिल) खरात याला दुसऱ्या गंभीर गुन्ह्यात पुन्हा न्यायालयात हजर करण्यात येणार आहे. सरकारवाडा पोलीस ठाण्यात दाखल असलेल्या ७६/२०२६ या क्रमांकाच्या गुन्ह्यांत पुन्हा एसआयटी त्याला कोर्टात आणणार आहेत. या दुसऱ्या गुन्ह्यात खरातला पुन्हा पोलीस कोठडीत खेचण्यासाठी एसआयटीने प्रयत्नशील आहे. उद्या होणाऱ्या सुनावणीत खरातला बेल मिळणार की जेल? याकडे सर्वांचे लक्ष लागले आहेत.

खरातची पत्नी कल्पना खरात ही देखील या गुन्ह्यांमध्ये तितकीच सहभागी असल्याचे समोर आले आहे. पोलिस चौकशी करण्यासाठी येण्यापूर्वी ती फरार झाली आहे. पोलीस पथके तिचा शोध घेत आहेत.