Mahayuti News : महायुतीत बंडोबा वाढले, समजूत काढताना दमछाक होणार

Ahilyanagar News : अहिल्यानगर जिल्ह्यात महायुती आणि महाविकास आघाडीत जागा वाटपावरून आणि उमेदवारी निश्चित करण्यावरून गोंधळाची स्थिती निर्माण झाली आहे. बंडखोरीची अधिक शक्यता आहे.

श्रीरामपूर आणि नेवासा विधानसभा मतदारसंघात महायुतीमधील गोंधळ मिटले नाही. उलट अहिल्यानगर शहर विधानसभा मतदारसंघात बंडखोरांना शांत करण्याचं आव्हान वरिष्ठ नेत्यांसमोर असणार आहे.

नेवासा आणि श्रीरामपूर विधानसभा मतदारसंघात महायुतीमधील दोन पक्षांनी आपपाल्या उमेदवारांना 'AB' फॉर्म दिल्यानं गोंधळ निर्माण झाला आहे. नेवासा मतदारसंघात महायुतीमधील भाजपचे (BJP) जिल्हाध्यक्ष विठ्ठलराव लंघे एकनाथ शिंदे यांच्या शिवसेनेच्या चिन्हावर लढणार आहे. त्यांनी 'AB' फॉर्मसह आपला उमेदवारी अर्ज दाखल केला. याशिवाय महायुतीतील अजित पवार यांच्या राष्ट्रवादी पक्षाकडून अब्दुल शेख यांनीही 'AB' फॉर्मसह उमेदवारी अर्ज भरला. तसंच भाजपचे माजी आमदार बाळासाहेब मुरकुटे यांनी देखील बंडखोरीची तयारी केली आहे.

श्रीरामपूरमध्ये काँग्रेसने (Congress) तिकीट कापल्यानंतर आमदार लहू कानडे यांनी महायुतीमधील अजित पवार यांच्या राष्ट्रवादी काँग्रेसकडून 'AB' फॉर्म घेत उमेदवारी अर्ज दाखल केला. महायुतीमधील एकनाथ शिंदे यांच्या शिवसेनेकडून माजी आमदार भाऊसाहेब कांबळे यांनी देखील 'AB' फॉर्मसह अर्ज भरला आहे. याशिवाय शिवसेनेचे माजी खासदार सदाशिव लोखंडे आणि त्यांचे पुत्र प्रशांत लोखंडे यांनी देखील अर्ज भरला आहे.

शिंदे आणि अजितदादांचे उमेदवार आमने-सामने

या दोन्ही जागा महायुती आणि 'मविआ'साठी खूप महत्त्वाच्या आहेत. त्यामुळे बंडखोरांना शांत करण्याचे आव्हान वरिष्ठ नेत्यांसमोर आहे. श्रीरामपूरमध्ये शिवसेनेचे माजी खासदार सदाशिव लोखंडे आणि त्यांचे पुत्र प्रशांत लोखंडे यांनी बंडखोरीचे निशाण फडकवलंय. त्यामुळे महायुतीत लोखंडे यांना कोणता शब्द मिळतो, किंवा लोखंडे काय भूमिका घेतात याकडे लक्ष लागलं आहे.

आमदार कानडे आणि माजी आमदार कांबळे दोघेही इच्छुक आहे. त्यांनी प्रचाराला सुरवात देखील केली आहे. या दोघांचे उमेदवारांचे 'AB' फॉर्म पाहिल्यास कांबळेंचा शिंदेंच्या शिवसेनेचा आणि कानडेंचा अजितदादांच्या राष्ट्रवादीचा. राज्याचा कारभारात शिंदे आणि पवारांचे जास्त जुळलं नाही. त्यामुळे श्रीरामपूरमध्ये काय होणार, यायचीच जास्त चर्चा आहे.

भाजपचे मुरकुटे निर्णायक भूमिकेत

नेवाशात भाजपचे माजी आमदार बाळासाहेब मुरकुटे महायुतीमधून इच्छुक होते. परंतु त्यांना उमेदवारी नाकरली. त्यामुळे त्यांनी प्रहार, भाजप, शिवसेना आणि अपक्ष, असे चार अर्ज दाखल केलेत. यामुळे गोंधळाची स्थिती निर्माण झाली आहे.

यातच भाजपचे जिल्हाध्यक्ष विठ्ठलराव लंघे यांना ऐनवेळी महायुतीने शिवसेनेच्या चिन्हांवर निवडणुकीच्या रिंगणात उतरवलं. हा प्रयोग महायुतीमधील भाजप आणि शिवसेनेच्या स्थानिक नेत्यांना कितपत रुचला हा संशोधनाचा विषय बनला आहे. या निर्णयाचे स्पष्टीकरण दोन्ही बाजूकडून स्थानिक नेते वरिष्ठांकडे मागत आहेत.