BJP Politics : भाजपची रणनिती ठरली ! निवडणुकीआधी मुख्यमंत्री फडणवीस आख्खा महाराष्ट्र पिंजून काढणार

Maharashtra Politics : आगामी स्थानिक स्वराज्य संस्थांच्या निवडणुकांच्या पार्श्वभूमीवर भाजपने चांगलीच कंबर कसली आहे. त्यासाठी एकीकडे पक्षात मोठी इन्कमिंग मोहीम सुरु आहे. विरोधी पक्षातील मोठे मासे भाजप आपल्या गळाला लावत असून त्यांना पक्षात प्रवेश देत आहे. असे असताना दुसरीकडे पक्षाकडून आणखी एक रणनिती आखण्यात आली आहे.

स्थानिक स्वराज्य संस्थांच्या निवडणुकीआधी मुख्यमंत्री देवेंद्र फडणवीस स्वत: महाराष्ट्राचा दौरा करणार आहेत. या दौऱ्यात निवडणुकीच्या तयारी संदर्भात ते आढावा घेणार आहेत. भाजप प्रदेशाध्यक्ष रवींद्र चव्हाण यांनी तशी माहिती दिली आहे. शिवसेना उद्धव बाळासाहेब ठाकरे पक्षाचे मालवणमधील माजी नगराध्यक्ष आणि नगरसेवकांचा नुकताच रवींद्र चव्हाण यांच्या उपस्थितीत भाजपमध्ये प्रवेश झाला. यावेळी चव्हाण यांनी स्थानिक स्वराज्य संस्थांच्या निवडणुकीसाठी भाजपच्या तयारीबाबत भाष्य केले.

दरम्यान भाजप या निवडणुका भाजप स्वबळावर लढणार का असाही प्रश्न आहे. यासंदर्भात बोलताना रवींद्र चव्हाण यांनी सांगितले की, पंतप्रधान नरेंद्र मोदी, मुख्यमंत्री देवेंद्र फडणवीस यांच्या नेतृत्वाखाली निवडणुका होतील. ही निवडणूक कार्यकर्त्यांची आहे. देवेंद्र फडणवीस निवडणुकीपूर्वी महाराष्ट्राचा दौरा करणार आहेत. यादरम्यान धोरणात्मक निर्णय आवश्यक आहेत आणि ते घेतले जातील असं त्यांनी सांगितलं.

पंतप्रधान नरेंद्र मोदी आणि मुख्यमंत्री देवेंद्र फडणवीस यांच्या नेतृत्वाखाली महाराष्ट्र वेगाने पुढे जात आहे. फडणवीसांवर महाराष्ट्राच्या जनतेचा विश्वास आहे. लोकप्रतिनिधी आज भाजपकडे आशेने पाहत आहेत. भाजप न्याय देईल, अशी त्यांना अपेक्षा आहे. देवेंद्र फडणवीस हे विश्वासार्ह चेहरा म्हणून लोकांना वाटत आहेत असे चव्हाण यांनी म्हटले. दरम्यान चव्हाण यांची प्रदेशाध्यक्ष पदी झालेली निवड हाही भाजपच्या रणनितीचाच भाग आहे.

लोकसभा निवडणुकीत महाराष्ट्रामध्ये महायुतीला पराभवाला सामोरे जावे लागले होते. तर विधानसभा निवडणुकीत त्याची भरपाई करत मोठ्या प्रमाणात बहुमत मिळवत महायुती सत्तेवर आली आहे. मात्र आता स्थानिक स्वराज्य संस्थांच्या निवडणुका देखील तेवढ्याच महत्त्वाच्या ठरणार आहेत. त्यामुळे फडणवीसांच्या प्रमुख नेतृत्वात या निवडणुका लढवण्याची रणनीती भाजपने आखली आहे. तर दुसरीकडे पक्षातील पदाधिकारी आणि कार्यकर्त्यांना या निवडणुकीच्या माध्यमातून बळ देण्याचा प्रयत्न पक्षाकडून सुरु आहे. त्यासाठी मोठ्या प्रमाणात पक्षप्रवेशाचा सपाटाच भाजपच्या वतीने सुरू आहे.