Chhagan Bhujbal : धनंजय मुंडेंना बंगल्याबाहेर कसं काढणार? भुजबळांना पडला प्रश्न

Chhagan Bhujbal : परळीचे आमदार व माजी मंत्री धनंजय मुंडे यांनी मंत्रीपदाचा राजीनामा देऊन चार महिने उलटले तरीही ते अद्यापही सरकारी बंगल्यातच राहत असल्याची माहिती समोर आली आहे. धनंजय मुंडे यांचे अन्न व नागरी पुरवठा खाते मंत्री छगन भुजबळ यांना देण्यात आले आहे. तसेच ते राहत असलेला सातपुडा बंगलाही भुजबळांना दिला गेला आहे. परंतु धनंजय मुंडेंचा मुक्काम अद्याप सातपुडा बंगल्यावरच आहे. त्यामुळे मंत्री भुजबळांना निवास्थानासाठी प्रतीक्षा करावी लागत आहे.

राजीनामा दिल्यानंतर पुढच्या 15 दिवसांत बंगला रिकामा करणे अपेक्षित होते. परंतु धनंजय मुंडेंनी बंगला काही सोडला नाही. त्यामुळे बंगला वेळेत रिकामा न केल्यानं 42 लाखांचा दंड त्यांना भरावा लागणार आहे. दरम्यान यासंदर्भात मंत्री छगन भुजबळांनी माध्यमांशी बोलताना महत्वाचं भाष्य केलं आहे.

सरकारने छगन भुजबळ यांना धनंजय मुंडे यांचे खाते दिल्यानंतर 23 मे रोजी भुजबळांना सातपुडा बंगला दिला जावा असा अधिकृत आदेश काढला होता. त्यानुसार भुजबळांनी सातपुडा बंगल्यावर राहायला जाणे अपेक्षित होते.

परंतु यासंदर्भात बोलताना भुजबळ म्हणाले, मी मंत्रीपदाची शपथ घेतल्यानंर सामान्य प्रशासन विभागाने मला पंधरा दिवसांनी पत्र दिले की, तुमच्यासाठी अमुक-अमुक निवासस्थान देण्यात आलेले आहे. याचा अर्थ तुम्ही तिथे राहायला जावे. आता राहायला जावं असे म्हटल्यानंतर एखादं घर खाली असेल तरच आपण तिथे राहायला जाऊ शकतो. तिथे जर कुणी राहत असेल तर आपण त्यांना कसं काय बाहेर काढणार? असा सवाल भुजबळांनी उपस्थित केला आहे.

भुजबळ म्हणाले, धनंजय मुंडे हे आमचे सहकारी आहे. मी अजून मुंडे यांना यासंदर्भात एका शब्दानेही बोललेलो नाही. बंगल्याबाबत मुख्यमंत्री व इतर मंडळी काय चर्चा करायची ती करतील व निर्णय घेतील. अजित दादांनी देखील मला विचारणा केली होती की, नवीन घरात गेलात की नाही ते. पण खाली झाल्यावर जाईन असं मी त्यांना सांगितल्याचं भुजबळ म्हणाले.

मुंडे आमचे पक्षातील सहकारी असल्याने मी काय तक्रार करणार? मी फार-फार तर मुख्यमंत्र्यांना सांगेन की दुसरं एखादं छोटं मोठं घर असेल तर ते मला द्या म्हणून. मुख्यमंत्री काय निर्णय घेतील ते पाहू. मी यावर जास्त चर्चा करणार नाही असं भुजबळ म्हणाले.