Chhagan Bhujbal Politics; मंत्री भुजबळांच्या कार्यकर्त्यांना टिप्स; नेत्यांच्या पुढे पुढे करणे, हेलिपॅडवरचे स्वागत बंद करा, त्याएैवजी गरिबांची कामे करा!

Chhagan Bhujbal News: राज्याचे अन्न व नागरी पुरवठा मंत्री छगन भुजबळ यांनी राष्ट्रवादी काँग्रेसच्या कार्यकर्त्यांना मार्गदर्शन केले. यावेळी त्यांनी कार्यकर्त्यांना निवडणुकीच्या टिप्स देता देता चिमटेही घेतले. यानिमित्ताने कार्यकर्त्यांनी सावध व्हावे असा संदेश त्यात होता.

पक्षाच्या राष्ट्रवादी भवन या कार्यालयात छगन भुजबळ यांनी झालेल्या स्वागताला उत्तर दिले. ते म्हणाले, आपल्या पक्ष आणि मी स्वतः फुले-शाहू- आंबेडकर यांच्या विचारधारेनुसार काम करत आलो आहे. हा विचार म्हणजे गरीब श्रीमंत असा भेद न करता प्रत्येकासाठी काम करणे असा आहे. महापालिका व अन्य निवडणुका होणार आहेत. कार्यकर्त्यांनी त्या दृष्टीने कामाला सुरुवात केली तर आपला पक्ष तळागाळात पोहोचेल आणि वाढेल.

आपल्याला आगामी जिल्हा परिषद, पंचायत समिती, महापालिका निवडणुकीच्या तयारीला लागले पाहिजे, असे छगन भुजबळ म्हणाले. त्यासाठी आपल्याकडे पुरेसा कालावधी आहे. संधीचा लाभ घेऊन पक्षाच्या जास्तीत जास्त उमेदवारांना विजयी करण्याचे प्रयत्न आपल्याला करावे लागते.

अनेक कार्यकर्ते फक्त नेते आले की, त्यांच्या पुढे- पुढे करताना दिसतात. हार, गुच्छ घेऊन स्वागत करतात. काही महाभाग तर फक्त नेते आले की, हेलीपॅडवर स्वागत करायला हजरच असतात. नेत्यांच्या कानाला लागतात. काहीतरी सांगण्याचा प्रयत्न करतात. फोटो काढतात. मात्र नेत्यांनाही माहीत असते की, त्यांची प्रत्यक्षात, जनतेत किती किंमत आहे.

नेत्यांच्या पुढे मागे करण्यापेक्षा लोकांमध्ये जाऊन त्यांचे प्रश्न समजून घेतले पाहिजे. तुम्ही गरिबांची कामे केली, अडचणीत त्यांच्या मदतीला धावून गेलात तर गरीब माणसं कधीही कार्यकर्त्याला आणि मदत करणाऱ्याला विसरत नाहीत. त्याचा निवडणुकीत तुम्हाला शंभर टक्के फायदा होणारच.

मी देखील असाच तळागाळातून काम करत पुढे आलो आहे. आम्ही शिवसेनेत काम करताना शाखेत बसायचं. दिवसभर शाखेत बसून असल्याने प्रत्येकाला अडचणीच्या काळात हा कार्यकर्ता आपल्याला शाखेतच भेटेल असा विश्वास असायचा. कोणाला दवाखान्यात न्यायचे असेल, पोलीस केस झाली, किंवा अन्य अडचणी आल्या तर त्यांच्या मदतीला धावून गेले पाहिजे. त्यातून कार्यकर्ता घडतो.

शिवसेनेत काम करून मी नगरसेवक झालो, महापौर झालो आणि आमदार हे झालो. प्रत्येक कार्यकर्त्यांनी देखील अशाच प्रकारे सामान्य नागरिकांमध्ये वावरले पाहिजे. गरिबांच्या समस्या समजून घेऊन त्यांच्या संकटात धावून गेले पाहिजे. त्याचा फायदा निवडणुकीत हमखास होईल असा विश्वास त्यांनी व्यक्त केला.

-------