Devendra Fadnavis : मी सुद्धा महानुभावपंथीय.. फडणवीस असं म्हणताच झाला टाळ्यांचा कडकडाट

Devendra Fadnavis : अखिल भारतीय महानुभाव परिषदेच्या ३८ व्या अधिवेशनाचे उद्घाटन नाशिक येथे मुख्यमंत्री देवेंद्र फडणवीस यांच्या प्रमुख उपस्थितीत झाले. या कार्यक्रमात बोलताना फडणवीसांनी असं काही विधान केलं की, उपस्थितांनी टाळ्यांचा कडाड केला.

या कार्यक्रमात मुख्यमंत्री फडणवीस यांनी परिषदेचे नवनियुक्त अध्यक्ष मोहनराज कारंजेकर बाबा यांना नियुक्तीपत्र प्रदान केले आणि त्यांचे अभिनंदन केले. आपल्या भाषणात कारंजेकर बाबा म्हणाले, आपल्या महानुभावपंथाचे प्रवीण तायडे, अमोल जावळे आणि श्वेताताई नाईक हे तीन आमदार निवडून आले आहेत. या तीन्ही आमदारांचा यावेळी सत्कार करण्यात आला.

त्यानंतर मुख्यमंत्री फडणवीस भाषणासाठी उभे राहिले. ते म्हणाले, महंत कारंजेकर बाबा जे काही म्हणतात ते सगळं काही मला मान्य असतात. पण त्यांनी म्हटलेली एक गोष्ट मला पूर्णपणे मान्य नाही. महानुभाव पंथाचे महाराष्ट्रात तीन आमदार निवडून आले असं ते म्हणाले पण मी त्यात थोडी दुरुस्ती करतो. महाराष्ट्रात महानुभाव पंथाचा मुख्यमंत्री देखील निवडून आला आहे हे सांगायचं तुम्ही विसरलात. फडणवीस असं म्हणताच उपस्थितांनी टाळ्यांचा कडकडाड केला.

फडणवीस मिश्किलपणे म्हणाले, आता तुम्ही काय मला पंथांच्या बाहेर ठेवलंय? पंथाच्या सगळ्या कार्यक्रमात मी असतो. महानुभाव पंथांच्या सगळ्या परंपरा मला माहिती आहेत. त्यामुळे मी फार काही पंथाच्या बाहेर नाही, त्यामुळे यापुढे तुम्ही सांगितलं पाहीजे की, महाराष्ट्राचा मुख्यमंत्री देखील महानुभाव पंथाचा आहे, असं फडणवीस म्हणाले.

मुख्यमंत्री फडणवीस म्हणाले, सर्वज्ञ चक्रधर स्वामी यांनी देशातील सामान्य माणसाला आध्यात्मिक दिशा दाखविण्यासोबतच समाजात समता स्थापन करण्याचा विचार दिला. त्यांनी आपल्या साहित्याने मराठी भाषा समृद्ध केली, महानुभाव विचारांबरोबर मराठी भाषेला अभिजात भाषा म्हणून रुजविण्याचे कामही केले. मराठी भाषेला अभिजात भाषेचा दर्जा मिळण्यासाठी लीळाचरित्र आणि ज्ञानेश्वरी हे ग्रंथ उपयुक्त ठरले.

विविध आक्रमणे होऊनही महानुभाव विचार समाजात रुजूला. हा पंथ राज्य, देश आणि अफगाणपर्यंत विस्तारला आहे. या परंपरेने समतेचा विचार दिला. ही विचारसरणी राज्यासह देशासाठी महत्वाची आहे. मुख्यमंत्री झाल्यावर महानुभाव पंथाच्या स्थळांचा विकास सुरू केला असं फडणवीस म्हणाले.

नाशिकमधील जयशंकर लाॅन्स येथे या दोनदिवसीय अधिवेशनाला सुरुवात झाली. यावेळी जलसंपदा मंत्री गिरीश महाजन, शालेय शिक्षण मंत्री दादाजी भुसे, खासदार भास्कर भगरे, आमदार प्रवीण तायडे, आमदार अमोल जावळे, आमदार दिलीप बनकर, आमदार देवयानी फरांदे, आमदार सीमा हिरे, माजी आमदार बाळासाहेब सानप, परिषदेचे नवनिर्वाचित राष्ट्रीय अध्यक्ष मोहन कारंजेकर बाबा, महंत सुकेणकर बाबा, महंत चिरडेबाबा, महंत कृष्णराज बाबा मराठे, प्रकाश नन्नावरे, दत्ता गायकवाड आदी उपस्थित होते.