Girish Mahajan Politics: सुधाकर बडगुजर प्रकरणावरून नाशिकच्या भाजपमध्ये स्थानिक विरुद्ध प्रदेश वादाची ठिणगी?

Girish Mahajan News: शिवसेनेचे बडतर्फ आणि वादग्रस्त नेते सुधाकर बडगुजर प्रकरण चांगलेच तापले आहे. बडगुजर यांना भारतीय जनता पक्षात प्रवेश देण्यास सर्व स्थानिक नेत्यांचा प्रखर विरोध आहे. असे असताना पक्षाच्या राज्य स्तरावरील नेत्यांनी मात्र वेगळा सूर आळवल्याने अनेकांना त्याचे आश्चर्य वाटू लागले आहे.

भारतीय जनता पक्षाची उत्तर महाराष्ट्र स्तरावरील बैठक नाशिकला झाली. या बैठकीनंतर शिवसेनेचे बडतर्फ नेते सुधाकर बडगुजर यांच्या प्रवेशाचा विषय चर्चेत आला. प्रदेश अध्यक्ष चंद्रशेखर बावनकुळे यांनी त्यावर अनुकूल प्रतिक्रिया व्यक्त केली. आमदार सीमा हिरे यांचा विरोध स्थानिक राजकारणातील मतभेदामुळे व किरकोळ स्वरूपाचा असल्याचे त्यांनी सांगितले.

आता यावरून भाजप पक्षात नवा वाद निर्माण होण्याची शक्यता आहे. महसूल मंत्री बावनकुळे यांच्या विधानावरून वेगळ्याच राजकारणाचा वास येऊ लागला आहे. विशेषत: ही जबाबदारी मंत्री गिरीश महाजन यांच्यावर सोपविण्यात आली. त्यामुळे जलसंपदा मंत्री महाजन हे श्री. बडगुजर यांच्या विषयी आग्रही का? ही चर्चा सध्या जोरात आहे.

भारतीय जनता पक्षाचे नाशिक जिल्ह्यात पाच आमदार आहेत. असे असतानाही यापूर्वी कोणत्याही आमदाराला मंत्रिमंडळात संधी मिळाली नव्हती. जलसंपदा मंत्री महाजन हे प्रदीर्घकाळ नाशिकचे पालकमंत्री राहिले आहेत. त्यानिमित्ताने नाशिकच्या राजकारणावर त्यांनी आपली पकड घट्ट केली. ही पकड ढिली होऊ नये यासाठी मंत्री महाजन सतत प्रयत्नशील आणि सावध असतात.

नाशिक शहरात देवयानी फरांदे, सीमा हिरे आणि राहुल ढिकले हे तीन आमदार आहेत. तीनही आमदार आपल्या स्तरावर विविध राजकीय आणि विकासाची कामे करीत असतात. त्यांच्यात सध्या तरी कोणताही राजकीय वाद नाही. मात्र प्रदेश स्तरावर या तीनही आमदारांमध्ये एकोपा नसल्याचे चित्र निर्माण करण्यात आले आहे. यामागे कोणाची सोय आहे याची चर्चा पक्षातील पदाधिकारी करताना दिसतात.

नाशिकच्या आमदार आणि पदाधिकाऱ्यांमध्ये समन्वय आणि एकोपा असा संदेश गेल्यास बाहेरचे नेतृत्व लादले जाते. सध्या तरी नाशिकच्या राजकारणात हीच स्थिती सुरू आहे. भाजपमध्ये देखील जाणीवपूर्वक असे चित्र निर्माण तर करण्यात येत नाही ना? हा सध्या पदाधिकाऱ्यांमध्ये नाराजीचा आणि चर्चेचा विषय आहे.

स्थानिक स्तरावर असे मतभेद असल्यास त्याचा फायदा कोणला आणि कोणत्या मंत्र्याला होईल, हे जगजाहीर आहे. शिवसेनेचे बडतर्फ नेते सुधाकर बडगुजर यांना पक्षात प्रवेश दिल्यास बडगुजर पुन्हा एकदा भाजपच्या जुन्या नेत्यांना अस्थिर करण्यासाठी आपली शक्ती पणाला लावू शकतात. त्यामुळेच तर श्री. बडगुजर यांच्यासाठी पक्षाचे राज्यस्तरीय नेते पायघड्या अंथरत नाही ना?, याची अनेकांना धास्ती आहे.

-----