Eknath Shinde : भाजप सुद्धा कान लावून बसलाय, एकनाथ शिंदे शिवसेना नेत्यांना काय मंत्र देणार?

Eknath Shinde : आगामी नाशिक महापालिका निवडणुकीच्या पार्श्वभूमीवर भाजप फार आधीपासून तयारीला लागलेला आहे. भाजपने नाशिकमध्ये 100 प्लसचा नारा दिला आहे. भाजपपाठोपाठ आता शिवसेना शिंदे गटही सक्रिय झाला असून उपमुख्यमंत्री व पक्षाध्यक्ष एकनाथ शिंदे यांच्या उपस्थितीत शिंदे गट शक्तीप्रदर्शन करणार आहे.

एकनाथ शिंदे यांच्या उपस्थितीत आज रविवारी (ता. 5) रात्री 7 वाजता सातपूर येथील हॉटेल डेमोक्रसी येथे कार्यकर्ता मेळाव्याचे आयोजन करण्यात आले आहे. या माध्यमातून शिंदे गटाने शक्तिप्रदर्शनाची जोरदार तयारी केले असून विरोधकांसह मित्रपक्ष असलेल्या भाजप व राष्ट्रवादीलाही ताकद दाखविण्याचा प्रयत्न या माध्यमातून केला जाणार आहे.

भाजपने नाशिक महापालिका व जिल्हा परिषद निवडणूक स्वबळावर लढण्याची तयारी सुरु केली आहे. त्यापार्श्वभूमीवर एकनाथ शिंदे या मेळाव्यात स्वबळाची घोषणा करतात का? शिवसेनेचे सगळे प्रमुख पदाधिकारी व बुथप्रमुखांना एकनाथ शिंदे नेमका काय कानमंत्र देतात याकडे विरोधकांसह भाजपचेही लक्ष लागून आहे. कारण या मेळाव्यातून आगामी महापालिका निवडणुकीची रणनिती शिंदे सेना ठरवणार आहे.

एकीकडे, नाशिक महापालिकेत 100 हुन अधिक नगरसेवक निवडून आणण्याचा नारा भाजपने दिला आहे. त्यासाठी भाजपने अन्य पक्षांतून मोठ्या प्रमाणात इनकमिंग सुरू केले आहे. शिवसेना शिंदे गटही या स्पर्धेत मागे नाही. अन्य पक्षातील नेते गळाला लावण्यासाठी भाजप व शिवसेनेत नाशिकमध्ये झालेली रस्सीखेच काही लपून राहिलेली नाही. भाजपपाठोपाठ आता शिंदे गटानेही स्वबळावर लढण्याची तयारी सुरू केली आहे. त्यासाठीच शिंदेंच्या उपस्थितीत कार्यकर्ता मेळाव्याचे आयोजन केले आहे.

महायुतीतील घटक पक्ष महापालिका निवडणुकीला वेगवेगळे लढल्यास खरी टक्कर ही शिवसेना व भाजप मध्येच होणार आहे. त्यामुळे एकमेकांची रणनिती समजून घेण्याचा प्रयत्न दोघेही पक्ष करत आहेत. दोन्ही पक्षातील नेत्यांकडून एकमेकांवर कुरघोडी करण्याचा प्रयत्नही होताना दिसतो आहे. नाशिकमध्ये भाजपचे दोन माजी नगरसेवक गंभीर गुन्ह्यात जेलमध्ये आहेत. असे असताना शिवसेनेचे मंत्री दादा भुसे यांनी भाजप नेत्यांच्या आधी कुरघोडी करत शहरातील गुन्हेगारीच्या विषयावर पोलिस आयुक्तांसोबत बैठक घेऊन काही सूचना केल्या होत्या. त्यानंतर भाजप आमदारांनीही पोलिस आयुक्तांसोबत बैठक घेत याविषयावर चर्चा केली होती.

नाशिकमधील पक्षाच्या कार्यकर्ता मेळाव्यापूर्वी एकनाथ शिंदे जिल्हाधिकारी कार्यालयात बैठक घेणार आहेत. या बैठकीच्या माध्यमातून जिल्ह्यातील विकासकामांचा आढावा घेतला जाणार आहे. त्याातून शिंदे गटही सत्तेत आहे याची जाणीव अधिकाऱ्यांना करून दिली जाणार असल्याची चर्चा आहे.