Maratha Reservation Protest : भुजबळांच्या मतदारसंघात प्रत्येक मोठ्या गावात होणार उपोषण!

Yeola Maratha Politics : मराठा आरक्षणाच्या प्रश्नावर राज्य सरकारने मनोज जरांगे पाटील यांच्याकडून चाळीस दिवसांची मुदत घेतली होती. मात्र, ती मुदत संपल्यावरदेखील राज्य सरकार चालढकल करीत असल्याने फसवणूक झाल्याची भावना मराठा समाजामध्ये निर्माण झाली आहे. ( Maratha community feels unhappy about non compliance of reservation deemand)

आरक्षणाची (Maratha reservation) मागणी राज्य सरकारने (Maharashtra Government) जाहीर केलेल्या वेळेत पूर्ण केलेली नाही. त्यामुळे मराठा समाजात असंतोष पसरला आहे. याबाबत अन्न व नागरी पुरवठा मंत्री छगन भुजबळ (Chhagan Bhujbal) यांच्या येवला मतदारसंघातील सर्व मोठ्या गावांता साखळी उपोषण सुरू करण्यात येणार आहे.

येवला तालुक्यात मराठा समाजासाठी आरक्षणाचा विषय अत्यंत संवेदनशील बनला आहे. मनोज जरांगे पाटील यांनी येथे भेट देऊन जाहीर सभा घेतली होती. त्यात आरक्षणाच्या प्रश्नावर शासनाने दिलेली डेडलाइन पाळली नाही, तर व्यापक आंदोलन करण्याचा इशारा दिला होता.

आता या प्रश्नावर शासनाचे लक्ष वेधण्याची गरज आहे. त्यासाठी नेत्यांना गावबंदीसह तालुक्यातील प्रत्येक मंडलात मराठा युवकांनी साखळी उपोषण करण्याचा निर्धार सकल मराठा समाजाच्या पदाधिकाऱ्यांच्या बैठकीत घेण्यात आला. मनोज जरांगे पाटील यांनी दिलेल्या सूचनांनुसार पुढील रणनीती ठरविण्याचेही या वेळी निश्चित करण्यात आले.

समाजाने अनेक विषयांसाठी मोठी आंदोलने यशस्वी केली आहेत. आता आपल्या मुलांच्या शिक्षणासाठी, नोकरीसाठी जरांगे पाटील घेतील ती भूमिका घेऊन, एकसंघ होऊन आंदोलनाची तयारी सुरू करायची आहे. प्रत्येक मंडलात साखळी उपोषण करून आपली ताकद दाखवून देऊ. गावपातळीवरील अंतर्गत मतभेद, पक्ष, पद सर्व बाजूला ठेवून लढा उभा करण्यात येईल. या आंदोलनात एक सर्वसामान्य समाजबांधव म्हणून सर्वांनी सहभागी व्हावे. जरांगे पाटलांच्या मार्गदर्शनाखाली व त्यांनी दिलेल्या नियोजनानुसार आपणास आंदोलन उभे करण्यात येईल, असा निर्धार बैठकीत करण्यात आला.