Malegaon Politics: एका दगडात दोन पक्षी! आसिफ शेखांचा मास्टरस्ट्रोक; हिंदुत्ववादी राजकारणाची थेट कोंडी

Dada Bhuse News: मालेगाव महापालिकेच्या सत्तेच्या चाव्या माजी आमदार असिफ शेख यांच्याकडे आहेत. मात्र बहुमतासाठी त्यांना पाठिंब्याचा टेकू लागणार आहे. त्यासाठी सध्या शहरात जोरदार राजकीय गणिते मांडली जात आहेत.

मालेगाव महापालिकेत माजी आमदार असिफ शेख यांच्या इस्लाम पक्षाला ३५ जागा मिळाल्या आहेत. या संख्येच्या बळावर त्यांना महापौर आणि उपमहापौर यांसह मालेगावची सत्ता खुणावू लागली आहे. त्यासाठी त्यांनी अचूक खेळी करत शिवसेना एकनाथ शिंदे पक्ष आणि एमआयएम या दोघांची कोंडी केली आहे.

इस्लाम पक्षाचे माजी आमदार शेख यांनी आपले कट्टर विरोधक आमदार मौलाना मुक्ती इस्माईल यांच्याकडे पाठिंब्याची मागणी केली होती. त्याचवेळी त्यांनी हिंदुत्वाच्या राजकारणावरून विरोधकांना दिवस असणाऱ्या शिवसेना एकनाथ शिंदे पक्षालाही पाठिंबाचे आवाहन केले आहे. यावरून शिक्षण मंत्री दादा भुसे यांच्या भूमिकेकडे सगळ्यांचे लक्ष आहे.

शिक्षण मंत्री दादा भुसे यांची या प्रश्नावरून चांगलीच राजकीय कोंडी झाली आहे. १८ जागा मिळवूनही हा पक्ष सत्तेत सहभागी होऊ शकत नाही. यापूर्वी त्यांची माजी आमदार रशीद शेख यांच्याशी सत्तेसाठी युती झाली होती हे विशेष.

एमआयएम पक्षाने माजी आमदार शेख यांचा पाठींब्याच्या मागणीचा प्रस्ताव धुडकावला आहे. त्या पाठोपाठ शिक्षण मंत्री भुसे यांनीही मालेगावात माजी आमदार शेख यांना पाठिंबा देण्यास नकार दिला. या दोन्ही नकारांमुळे माजी आमदार शेख यांचा सत्तेचा मार्ग सोपा झाला आहे.

बहुमतासाठी ४३ नगरसेवकांची आवश्यकता आहे. माजी आमदार शेख यांचे ३५ आणि समाजवादी पक्षाचे पाच असे ४० नगरसेवक या आघाडीकडे आहेत. काँग्रेस पक्षाचे तीन नगरसेवक आहेत. पक्षाने माजी आमदार शेख यांना पाठिंबा दण्याची तयारी दाखवली आहे. तर त्यासाठी काँग्रेसने टाकलेल्या अटी माजी आमदार शेख स्वीकारणार का? हा गंभीर प्रश्न आहे.

या पार्श्वभूमीवर मालेगावचा राजकारणात शिवसेना एकनाथ शिंदे पक्ष विरोधात बसणार हे स्पष्ट झाले आहे. त्याचबरोबर माजी आमदार शेख यांचा कट्टर विरोधक एमआयएम यांचीही राजकीय अडचण करण्यात माजी आमदार शेख यशस्वी झाले आहे. त्यानिमित्ताने त्यांनी मालेगावची सत्ता आपल्याकडे ठेवतानाच एका दगडात दोन पक्षी मारले, अर्थात आपले प्रमुख विरोधक टिपले आहेत.

_____