Jarange On Raj Thackeray : नाशिकचं पाणीच वेगळं हाय; राज ठाकरेंच्या प्रश्नावर जरांगे पाटलांचं उत्तर

Nashik News : राज ठाकरे यांचं व्यक्तीमत्व चांगलं आहे. त्यांच्या पाठीशी तरुणवर्गही मोठ्या प्रमाणावर आहे. ते आरक्षणाविरोधात कधीच काही बोलत नाहीत. नाशिकला आल्यानंतर ते काही बोलले असतील, तर नाशिकचं पाणीही तसंच असल्याचे म्हणत जरांगेंनी भुजबळांचे नाव न घेता टीका केली. ठाकरे यांचा तो प्रश्न नाशिकपुरताच मर्यादीत होता, असेही जरांगे यांनी स्पष्ट केले. (Manoj Jarange Patil's reply to a question raised by Raj Thackeray)

मराठा आरक्षणासाठी लढणारे मनोज जरांगे पाटील यांनी आरक्षणाच्या मागणीसाठी काढलेला विराट मोर्चा ऐतिहासिक ठरला. लाखो मराठा समाज बांधव त्यांच्या सोबत मुंबईकडे चालत गेले. मुख्यमंत्री एकनाथ शिंदे यांनी हा मोर्चा मुंबईला पोचण्यापूर्वीच वाशी येथे वाटाघाटी सुरू केल्या होत्या. जरांगे पाटील यांच्या मागण्या पूर्ण करीत तशी अधिसूचना सरकारने मराठा समाजाच्या हाती दिली. जरांगे पाटील यांच्यासह गुलाल उधळत मराठा मोर्चेकरी माघारी फिरले. (Jarange Patil On Raj Thackeray)

(राजकारणातील महत्त्वाच्या बातम्यांचे अपडेट्ससाठी सरकारनामाचे अधिकृत WhatsApp चॅनल फॉलो करा!)

नाशिक दौऱ्यावर आलेले महाराष्ट्र नवनिर्माण सेनेचे प्रमुख राज ठाकरे यांनी नेमके याच बाबीवर बोट ठेवत काही प्रश्न उपस्थित केले आहेत. जरांगे पाटील यांनी नेमका कोणत्या विजयाचा गुलाल उधळला, असा प्रश्न ठाकरे यांनी उपस्थित केला होता. मी स्वत: जरांगे पाटील यांच्याशी बोललो होतो. सरकारकडून अधिसूचनेच्या आडून धूळफेक होत असल्याचे सांगितले होते. कायदा मंजूर झालेला नसताना विजयोत्सव कसा साजरा झाला, असा सवाल ठाकरे यांनी उपस्थित केला होता.

दरम्यान, नाशिक दौऱ्यावर आलेल्या मनोज जरांगे पाटील यांना याच अनुषंगाने प्रश्न विचारण्यात आला होता. त्या वेळी त्यांनी राज ठाकरे यांची स्तुती केली. राज ठाकरे यांच्या पाठीशी तरुणवर्ग मोठ्या प्रमाणावर आहे. ते आरक्षणाविरोधात कधीच काही बोलत नाहीत. नाशिकला आल्यानंतर ते काही बोलले असतील, तर नाशिकच पाणीही तसंच असल्याचे म्हणत जरांगे यांनी भुजबळांचे नाव न घेता टीका केली. ठाकरे यांचा तो प्रश्न नाशिकपुरताच मर्यादीत होता. त्यानंतर ते बोलले नाहीत, याकडे जरांगे पाटील यांनी लक्ष वेधले.

Edited By : Vijay Dudhale