Ambadas Danve Shivsena Vs BJP : अंबादास दानवेंनी फोडला आरोपाचा बॉम्ब; भाजपच्या माजी नगरसेवकाकडून आमदाराच्या हत्येची सुपारी? गिरीश महाजनांचा संदर्भ दिल्यानं खळबळ

Ambadas Danve News : विधान परिषदेतील माजी विरोधी पक्षनेते अंबादास दानवे यांनी सोमवारी राजकीय बॉम्ब फोडला. यावेळी त्यांनी थेट जलसंपदा मंत्री गिरीश महाजन यांचे नाव घेतले. त्यामुळे या आरोपाने मोठी राजकीय खळबळ उडाली आहे.

शिवसेना उद्धव ठाकरे पक्षाचे नेते अंबादास दानवे यांनी नांदेड इथं एका वृत्तवाहिनीला माहिती दिली. त्यात नाशिक शहरातील भाजपच्या राजकारणातील वाद चव्हाट्यावर आला. यामध्ये नगरसेवक आणि आमदार यांचा उल्लेख करण्यात आला आहे.

शिवसेना नेते अंबादास दानवे (Ambadas Danve) म्हणाले, "नाशिक शहरातील एका माजी नगरसेवकाने सुपारी दिली. हा माजी नगरसेवक जलसंपदा मंत्री गिरीश महाजन यांचा निकटवर्तीय असल्याचे बोलले जाते. या नगरसेवकाने शहरातील एका आमदाराची सुपारी दिल्याने हा गंभीर विषय आहे."

या प्रकरणाची पोलिसांनी आणि राज्य सरकारने तपासणी करावी. यात सुपारी देणारा माजी नगरसेवक कोण? हे सर्वश्रुत आहे. दानवे यांनी संबंधित माजी नगरसेवक कोण? त्याचा उल्लेख मात्र टाळला.

शिवसेना नेते अंबादास दानवे हे आक्रमक नेते म्हणून परिचित आहेत. सत्ताधारी महायुतीच्या नेत्यांवर गंभीर आरोप यापूर्वीही त्यांनी केले आहेत. मात्र नवा आरोप हा नाशिक (Nashik) शहरातील माजी नगरसेवक आणि आमदारांची संबंधित असल्याने एकच खळबळ उडाली आहे.

या प्रकरणात श्री दानवे यांनी थेट जलसंपदा मंत्री गिरीश महाजन यांचा उल्लेख केला आहे. यातील माजी नगरसेवक हा मंत्र्यांशी अतिशय घनिष्ठ संबंध असलेला आहे. त्यामुळे हे प्रकरण अत्यंत गंभीर आणि धक्कादायक आहे. भाजपच्या अनेक पदाधिकाऱ्यांत तो नगरसेवक कोण आणि कोणत्या आमदाराविषयी सुपारी दिली याची कुजबुज सुरू झाली आहे.

अंबादास दानवे यांनी भाजप नेत्यांवर आरोपाचा राजकीय बॉम्ब फोडला आहे. त्यात नाशिक शहर आणि मंत्री महाजन यांचा थेट उल्लेख केला आहे. त्यामुळे भाजपकडून त्याला काय उत्तर दिले जाते याची प्रतीक्षा आहे.