Manikrao Kokate News: क्रीडा मंत्री माणिकराव कोकाटे हे बिनधास्त राजकारणी म्हणून परिचित आहेत. या बिनधास्तपणाने आजवर त्यांची आमदारकीची वाट मोकळी होत आली आहे. आता मात्र हाच बिनधास्तपणा त्यांना नडला की काय? अशी चर्चा आहे.
राष्ट्रवादी काँग्रेस अजित पवार पक्षाला नाशिकमधून मोठा धक्का बसला आहे. थेट पक्षाचा कॅबिनेट मंत्र्यालाच अटक करण्याचे आदेश न्यायालयाने काढले. गेल्या दोन दिवसांपासून हे प्रकरण चर्चेत आहे.
नागरी कमाल जमीन धारणा कायदा (यूएलसी) कोट्यातील सदनिका मंत्री माणिकराव कोकाटे यांनी मिळवली होती. स्वतः मंत्री कोकाटे आणि बंधू अशा दोघांनाही या सदनिका मिळाल्या. त्यासाठी त्यांनी बनावट कागदपत्रे सादर केल्याचा आरोप आहे.
मंत्री माणिकराव कोकाटे यांचे सिन्नर मतदारसंघातील परंपरागत विरोधक (कै) तुकाराम दिघोळे यांनी याबाबत खटला दाखल केला होता. त्यांनीच त्याचा गांभीर्याने पाठपुरावा केला. दिघोळे यांच्या पश्चात त्यांच्या कन्या अंजली दिघोळे यांनी न्यायालयात हा खटला लावून धरला.
तीस वर्षांनी या खटल्याचा निकाल लागला आहे. विशेष म्हणजे दहा महिन्यांपूर्वी कोकाटे यांना कनिष्ठ न्यायालयाने दोषी ठरविले होते. त्या विरोधात केलेले अपील अवघ्या दहा महिन्यात वरिष्ठ न्यायालयाने निकाली काढले. मंत्री कोकाटे यांना या प्रकरणात दोषी ठरवले.
मंत्री कोकाटे यांच्या विरोधात सबंध टीम काम करीत होती. त्यांच्या पाठपुराव्याला यश आले. न्यायालयाने मंत्री कोकाटे यांना दोषी ठरविले. त्यावर मंत्री कोकाटे यांचे वकील अविनाश भिडे यांनी श्री कोकाटे हे मंत्री आहेत, याचा विचार करावा. मंत्री कोकाटे आजारी आहेत, त्यामुळे ते अनुपस्थित राहिले असा दावा केला.
येथे मात्र मंत्री कोकाटे यांचा बिनधास्त स्वभाव त्यांना अडचणीचा ठरला. आजारी असल्याबद्दल कोणताही पुरावा सादर करण्यात आला नाही. त्यामुळे तो ग्राह्य धरण्यास विरोध झाला. मंत्री कोकाटे हे आज झालेल्या मंत्रिमंडळाच्या बैठकीला उपस्थित होते. काही दिवसांपूर्वी त्यांनी नगरपालिका निवडणुकीत प्रचार केला. सभा घेतली. विविध कार्यक्रमांना हजेरी लावली. अशी व्यक्ती आजारी कशी? असा बिनतोड दावा वकिलांनी केला.
या सर्व प्रकरणात न्यायालयीन सुनावणी हजर राहणे. विरोधात निकाल लागला आणि शिक्षा झाली तरीही कोर्टात हजर न राहणे, हे मंत्री कोकाटे यांच्या बिनधास्त स्वभावाला साजेशेच होते. मात्र आज ते त्यांच्या विरोधात गेले. न्यायालयाने मंत्री आणि सामान्य नागरिक कायद्यापुढे समान असतात, असे सांगून त्यांना त्वरित अटक करण्याचे आदेश काढले.
------
सरकारनामाचे सदस्य व्हा
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read Latest Marathi Political News, Breaking Political News from Maharashtra, India, Pune & Mumbai at Sarkarnama. To Get Live Political Marathi News on Mobile, Download the Sarkarnama Mobile App for Android and IOS. सरकारनामा आता सर्व सोशल मीडिया प्लॅटफॉर्मवर. ताज्या राजकीय घडामोडींसाठी फेसबुक, ट्विटर, इन्स्टाग्राम, शेअर चॅट, टेलिग्रामवर आणि व्हॉट्सॲप आम्हाला फॉलो करा. तसेच, सरकारनामा यूट्यूब चॅनेलला आजच सबस्क्राइब करा.