Local Body Elections : उत्तर महाराष्ट्रातील दोन ठिकाणच्या निवडणुकांना आयोगाकडून स्थगिती, समोर आलं मोठं कारण..

ECI postpones municipal elections Maharashtra: राज्यभरात नगरपालिका व नगरपंचायतींच्या सार्वत्रिक निवडणुकांची रणधुमाळी सुरु आहे. काल निवडणूक चिन्ह वाटपाची प्रक्रिया पार पडल्याने आता प्रचाराला वेग येणार आहे. 2 डिसेंबर रोजी मतदान होणार असून त्याचा निकाल 3 डिसेंबर रोजी लागणार आहे. परंतु या रणधुमाळीत उत्तर महाराष्ट्रातील नाशिक व धुळे जिल्ह्यातील दोन ठिकाणच्या निवडणुका स्थगिती करण्यात आल्या आहे.

नाशिक जिल्ह्यातील मनमाड नगरपालिकेच्या प्रभाग क्रमांक १० मधील उमेदवार नितीन वाघमारे यांचा मृत्यू झाल्याने प्रभाग क्रंमाक १० ची निवडणूक स्थगित करण्यात आली आहे. राज्य निवडणूक आयोगाने याबाबत अधिकृत पत्र जिल्हाधिकाऱ्यांना पाठविले आहे.

मनमाड नगरापालिकेत प्रभाग क्रमांक १० अ मधून शिवसेना उद्धव बाळासाहेब ठाकरे पक्षातर्फ नितीन अनिल वाघमारे हे निवडणूक लढवत होते. परंतु निवडणुकीची धामधुम सुरु असतानाच नितीन वाघमारे यांचं हृदयविकाराच्या झटक्याने निधन झालं आहे.

धुळे जिल्ह्यातील पिंपळनेर येथील प्रभाग क्रमांक दोनच्या उमेदवार कुसुमबाई पाथरे यांचेही निधन झाले. भाजपकडून प्रभाग 2 ब मध्ये कुसूमबाई खंडू पाथरे (वय ७५) या देखील निवडणुकीच्या रिंगणात होत्या. पण त्यांचेही हृदयविकाराच्या झटक्याने निधन झाले.

प्रभाग 2 ब मध्ये तिरंगी लढत होती. यात कुसुमबाई पाथरे (भाजप), आशा महेश वाघ (काँग्रेस) व वसिमा आबिद शेख (शिवसेना) या उमदेवारांचा समावेश होता. पैकी कुसुमबाई यांचे आकस्मिक निधन झाल्याने आता या प्रभागातील निवडणूक आता स्थगित करण्यात आली आहे.

त्यामुळे या दोन्ही जागांसाठीची निवडणूक स्थगित केली आहे. मात्र, या दोन्ही प्रभागांत नगराध्यक्षपदाची निवडणूक ठरल्याप्रमाणे होणार आहे. तसेच, दोन्ही प्रभागांमधील सदस्यांच्या निवडणुकीसाठी नव्याने कार्यक्रम घोषित केला जाईल, असेही आयोगाकडून स्पष्ट करण्यात आले.

बीडमध्येही निवडणूक स्थगित..

याशिवाय मराठवाड्यातही बीड जिल्ह्यातील गेवराई नगरपरिषद येथील प्रभाग 11 चे उमेदवार श्रीमती दुरदाना बेगम सलीम फारुकी यांचही निधन झाल्यानं या प्रभागातील निवडणूक स्थगित करण्यात आली आहे. उत्तर महाराष्ट्रातील दोन व मराठवाड्यातील एक असे राज्यातील तीन ठिकाणच्या निवडणुका स्थगित करण्यात आल्या आहेत.