MLC Election : नाशिक विधानपरिषदेत महायुतीला कडवी टक्कर देण्यासाठी 'मविआ'ची तयारी ; इस्लाम, समाजवादी पार्टीला सोबत घेण्याच्या हालचाली

Nashik Politics : महाराष्ट्र विधान परिषदेच्या निवडणुकीचे पडघम वाजले आहेत. १८ जूनला मतदान होणार असून २२ जून रोजी मतमोजणी करण्यात येणार आहे. त्यामुळे आता राजकीय हालचाली देखील अधिक गतिमान झाल्या आहेत. महायुती व महाविकास आघाडीच्या घटक पक्षांनी तयारी सुरु केली आहे.

नाशिक विधानपरिषद निवडणुकीत एकुण पक्षीय बलाचा विचार केल्यास महायुतीचे पारडे अधिक जड आहे. परंतु महाविकास आघाडीकडे सध्या संख्याबळ कमी असले तरी निवडणूक लढविण्याचा निर्णय झाला आहे. महाविकास आघाडी या निवडणुकीत ताकदीने उतरणार असून सगळे मिळून एकच उमेदवार देण्याचा प्रयत्न करणार असल्याची माहिती सूत्रांकडून कळते आहे.

एकीकडे महायुतीमधील घटक पक्ष असलेल्या भाजप, शिवसेना व राष्ट्रवादी प्रत्येक पक्षात दावेदार दिसत असताना आता महाविकास आघाडीकडून मात्र, सर्व मिळून एकच उमेदवार देण्याची तयारी केली जात आहे. शिवसेना (उबाठा), राष्ट्रवादी काँग्रेस (शरदचंद्र पवार) पक्ष व काँग्रेस यांच्यात निवडणूक लढवण्यासंदर्भात चर्चा सुरू आहे. महायुतीच्या उमेदवाराला सहजासहजी विजय मिळू द्यायचा नाही, यावर तिन्ही पक्षांचे सध्या एकमत झाले आहे.

विशेष म्हणजे महाविकास आघाडी आपल्यासोबत इस्लाम, समाजवादी पार्टी आणि एमआयएम सारख्या सर्व महायुतीच्या विरोधातील पक्षांची मोट बांधण्याच्या तयारीत असल्याचे वृत्त आहे. सर्व पक्षीयांची एकत्रित बैठक बोलवण्याचे देखील नियोजन केले जात आहे.

महायुतीकडून अनेकजण इच्छुक असून आपली दावेदार सांगत आहेत. त्यात विशेषत : गतवेळचे आमदार नरेंद्र दराडे हे सध्या शिंदे शिवसेनेकडू उमेदवारी करण्यास इच्छूक आहेत. त्यांची त्यादृष्टीने तयारी देखील सुरु आहे. त्याचवेळी त्यांच्याच पक्षातील आमदार सुहास कांदे यांच्या पत्नी अंजूम कांदे, भाऊसाहेब चौधरी, अजय बोरस्ते, विजय करंजकर ही नावे देखील चर्चेत आहेत.

तर भाजपकडून स्थायी समितीचे माजी सभापती गणेश गिते यांचे नाव चर्चेत आहे. आता भाजपमधील इच्छुकांची इतरही काही नावे पुढे येऊ लागली आहेत. त्यामुळे महायुती आता महायुती म्हणूनच लढणार की वेगवेगळे हे पाहण्याकडे इच्छुकांचे लक्ष लागले आहे. महायुतीकडून एक उमेदवार दिला जाण्याची शक्यता अधिक आहे.

असे असताना महाविकास आघाडीने मात्र सगळे मिळून एक उमेदवार देण्याच्या दृष्टीने तयारी केली आहे. त्यानुसार काँग्रेस, राष्ट्रवादी शरदचंद्र पवार पक्ष, शिवसेना उद्धव बाळासाहेब ठाकरे या महाविकास आघाडीतील तीन्ही पक्षाकडून आपले समविचारी पक्ष तसेच इतकेच नव्हे तर इस्लाम, एमआयएम, समाजवादी पार्टी या पक्षांनादेखील बरोबर घेण्याचे नियोजन सुरु असल्याची माहिती आहे. त्यामुळे संख्याबळ कमी असलं तरी महाविकासआघाडी पूर्ण ताकदीने उतरणार हे स्पष्ट आहे.