Nashik MLC Election : तर शिवसेनेला शह देण्यासाठी भाजप भुजबळांच्या पसंतीचा उमेदवार देणार, नाशिकच्या रणधुमाळीतील पडद्याआडची गोष्ट

Nashik MLC Election : विधानपरिषदेच्या नाशिकच्या जागेवरुन भाजप व शिवसेनेत धुसफूस सुरु झाली आहे. शिवसेना-भाजप दोन्ही पक्षांनी या जागेवर दावा सांगितल्याने इथे महायुती फिस्कटण्याची चिन्हे निर्माण झाली आहे.

२०१८ मध्ये झालेल्या निवडणुकीत नाशिकची जागा शिवसेनेकडे होती. शिवसेनेचे नरेंद्र दराडे हे निवडून आले होते. त्यामुळे पारंपारिक लढतीचा दाखला देत शिवसेनेने सर्वात आधी या जागेवर दावा ठोकला. ज्या पक्षाकडे विधानपरिषदेची जागा आहे, त्यांनीच ती लढवावी असा मतप्रवाह आहे. असे म्हणत खासदार श्रीकांत शिंदे यांनी सर्वप्रथम या जागेवर दावा सांगितला.

त्यानंतर भाजपचे शहाराध्यक्ष सुनिल केदार यांनी पक्षश्रेष्ठींना पत्र पाठवून नाशिकमध्ये भाजपची संघटनात्मक ताकद आणि सर्वाधिक मतदारसंख्या लक्षात घेता ही जागा भाजपलाच मिळावी अशी मागणी केली आहे. तसेच कुंभमेळा मंत्री गिरीश महाजन हेही नाशिकची जागा भाजपकडे ठेवण्यास अनुकूल असल्याचे समजते आहे.

विधानपरिषदेच्या जागेसाठी उपलब्ध आकडेवारीनुसार ६१९ सदस्य मतदान करणार आहेत. यात महायुतीचे पारडे जड असून महायुतीकडे ४६६ सदस्यांचे संख्याबळ आहे. त्यात भाजपकडे सर्वाधिक १८८, शिवसेनेकडे १७१ तर राष्ट्रवादीकडे १०७ सदस्य आहेत. सर्वांधिक मतदारसंख्या भाजपकडे असल्याने भाजपला ही जागा हवी आहे. परंतु महायुतीत शिवसेनेने ही जागा भाजपला सोडण्यास नकार दिल्यास दोन्ही पक्षांमध्ये मैत्रीपूर्ण लढत अटळ आहे असा अंदाज काही राजकीय जाणकार व्यक्त करत आहे.

दरम्यान शिवसेना-भाजप यांच्यात मैत्रिपूर्ण लढत झाल्यास राष्ट्रवादीचा कल महत्वाचा ठरणार आहे. त्यामुळे अशापरिस्थितीत शिवसेनेला शह देण्यासाठी भाजप राष्ट्रवादीला सोबत घेण्याची शक्यता आहे. इतकेच नव्हे तर भाजपकडून मंत्री छगन भुजबळ यांच्या पसंतीच्या उमेदवाराला उमेदवारी दिली जाऊ शकते अशीही माहिती सूत्रांकडून कळते आहे.

शिवसेनेकडून माजी आमदार नरेंद्र दराडे किंवा आमदार सुहास कांदे यांच्या पत्नी अंजुम कांदे यांना उमेदवारी मिळण्याची शक्यता अधिक आहे. दोघेही प्रबळ दावेदार मानले जात आहे. परंतु कांदे व दराडे दोघेही भुजबळांचे कट्टर विरोधक आहेत. कांदे विरुद्ध भुजबळ किंवा भुजबळ विरुद्ध दराडे हे राजकीय वैर जिल्ह्यात सर्वश्रुत आहे. त्यामुळे नरेंद्र दराडे किंवा अंजुम कांदे शिवसेनेने कुणालाही उमेदवारी दिली तर त्यांच्याविरोधात मंत्री भुजबळ भाजपला मदत करणार यात शंका नाही.

त्यामुळे भुजबळांच्या मदतीने भाजप शिवसेनेला शह देण्याची रणनिती आखू शकते. त्यासाठी भाजपकडून भुजबळांच्या पसंतीचा उमेदवार दिला जावू शकतो. तशा हालचाली देखील राजकीय वर्तुळात सुरु आहेत अशी माहिती सूत्रांकडून समजते आहे. शिवाय भाजप-राष्ट्रवादी समीकरण जुळल्यास त्यांचे संख्याबळही बहुमताच्या अगदी जवळ पोहचत असल्याने भाजपला विजय खेचून आणणेही सोपे आहे.