Gokul Gite : "निवडणूक 6 वर्षातून एकदा, एक संधी गेली हा गोल्डन चान्स..."; गोकुळ गीतेंनी दराडेंना सुनावलं, कॉल रेकॉर्डिंग व्हायरल

Nashik News, 05 Jun : नाशिक विधानपरिषदेची निवडणूक सतत नव्या राजकीय घडामोडींनी गाजते आहे. बंडखोरी कायम असल्याने महायुतीचे उमेदवार नरेंद्र दराडे यांच्या अडचणी वाढणार आहेत. या निमित्ताने निवडणुकीत काय होईल याची चाहूल लागली आहे.

अपक्ष गोकुळ गीते यांनी निवडणुकीत उमेदवारी कायम असणार हे जाहीर केले आहे. आमदार दराडे यांचे चिरंजीव यांनी आपला बाप काढत आव्हान दिले. त्यामुळे आपण दुखावले गेलो असा दावा त्यांनी केला आहे. माघारीनंतर हे चित्र स्पष्ट झाले.

त्यावर आमदार दराडे यांचे चिरंजीव कुणाल दराडे यांनी खुलासा केला आहे. गीते यांना कोणीतरी जाणीवपूर्वक चुकीची माहिती दिली आहे. गीते यांच्याकडे असलेल्या कॉल रेकॉर्डमधील आवाज माझा नाही असा दावा त्यांनी केला होता.

या पार्श्वभूमीवर महायुतीचे उमेदवार दराडे यांचे बंधू आमदार किशोर दराडे यांनी काल दिवसभर माघारीसाठी जंग जंग पछाडले. या संदर्भात एका मध्यस्थाकडून गोकुळ गीते यांच्याशी आमदार दराडेंचे झालेले संभाषण आता व्हायरल झाले आहे. त्यामुळे दराडे आणि गीते यांच्यातील राजकीय दुरावा वाढला आहे.

माघारीवर गोकुळ गीते यांनी, आमदार दराडे यांना स्पष्ट शब्दात सुनावत संभाषण खंडित केले. दराडे यांच्या घरात दोघेजण आमदार आहे. त्यामुळे आता आम्हाला संधी द्यावी. तुम्ही तरुण असल्याने माघार घ्यावी तुम्हाला भविष्यात संधी मिळेल, या दराडे यांच्या दाव्यालाही गीते यांनी खोडून काढले आहे.

निवडणूक सहा वर्षातून एकदा होते. विधानसभेला आमची संधी गेली. त्यामुळे आता हा गोल्डन चान्स आहे. तो आम्ही सोडणार नाही. यंदा दराडे यांनी आमच्यासाठी माघार घ्यावी. निमित्ताने समाजात निफाड तालुक्यासाठी एक आमदार होईल. त्याबाबत आम्ही सदैव दराडे आभार फ्रेम करून प्रदर्शित करू.

पुढच्या टर्मला आम्ही कुणाल दराडे यांच्यासाठी प्रतिष्ठा पणाला लावू. यंदा दराडे यांनी माघार घ्यावी आणि आम्हाला संधी द्यावी, असे थेट शब्दात गोकुळ गीते यांनी आमदार दराडे यांना सुनावले आहे. त्यामुळे ही निवडणूक अधिक टोकाचा संघर्ष असणारी असेल याची चाहूल लागली आहे. हे संभाषण असलेला व्हिडिओ गीते यांच्या समर्थकांनी समाज माध्यमांवर व्हायरल केल्याने चांगलीच खळबळ उडाली आहे.