Nashik Politics: भाजपमधील इच्छुकांना खुणावतेय उद्धव ठाकरेंची शिवसेना!

शिवसेना बाळासाहेब ठाकरे पक्षप्रमुख उद्धव ठाकरे आणि खासदार संजय राऊत यांच्या उपस्थितीत भाजपच्या माजी नगरसेविका संगीता गायकवाड आणि मंडल अध्यक्ष हेमंत गायकवाड यांनी प्रवेश केला. महायुतीकडे प्रवेशासाठी ओघ सुरू आहे. या स्थितीत ठाकरेसेनेला हा दिलासा मानला जात आहे.

महापालिका निवडणुकीच्या पार्श्वभूमीवर शहरात राजकीय गुन्हेगारी चर्चेत आहे. याविषयी भाजपवर आणि भाजप नेत्यांवर नागरिकांमध्ये रोष आहे. त्याचा फायदा शिवसेना उद्धव ठाकरे पक्ष घेण्याच्या तयारीत आहे.

या संदर्भात माजी आमदार वसंत गीते, माजी महापौर विनायक पांडे, संपर्क नेते दत्ता गायकवाड आदींची टीम सक्रिय झाली आहे. भाजपमध्ये उमेदवारीसाठी प्रचंड स्पर्धा आहे. स्थितीत ना उमेद झालेल्या भाजपच्या इच्छुकांना ठाकरे पक्षाकडून टार्गेट केले जाणार आहे.

गेल्या वर्षभरात एकनाथ शिंदे यांच्या शिवसेनेने उद्धव ठाकरे पक्षाला आव्हान दिले होते. उद्धव ठाकरे यांचे अनेक माजी नगरसेवक एकनाथ शिंदे यांच्या पक्षात गेले आहेत. या सगळ्यांना उमेदवारीची अपेक्षा आहे. सध्या मात्र हे सर्व राजकीय गोंधळात सापडले आहेत.

जलसंपदा मंत्री गिरीश महाजन यांनी महापालिकेसाठी 100 प्लस ही घोषणा केली आहे. त्यामुळे येईल त्याला प्रवेश असे धोरण राबवले. पक्षाचे 65 माजी नगरसेवक आणि प्रवेश केलेल्या 30 ते 40 जणांना उमेदवारी हवी आहे. मोठ्या प्रमाणावर इनकमिंग झाल्याने इच्छुकांचे समाधान कसे करणार? हा प्रश्न निर्माण झाला आहे.

नाशिक महापालिकेसाठी महायुती होणार की स्वबळावर निवडणुका करायच्या हा प्रश्न भाजपने सोडवलेला नाही. एका जागेसाठी चार ते पाच इच्छुक आहेत. त्यामुळे अनेक इच्छुकांची झोप उडाली आहे. शिवसेना उद्धव ठाकरे पक्षाने ही संधी साधण्याचा पुरेपूर प्रयत्न सुरू केला आहे.

यासंदर्भात यापुढे प्रत्येक आठवड्यात नाशिकला शिवसेनेत इनकमिंग होईल. चारित्र्यसंपन्न आणि शिक्षित युवकांना शिवसेना प्रवेश दिला जाणार आहे. शहराला खड्डे, भ्रष्टाचार आणि राजकीय गुन्हेगारीत लोटणाऱ्यांपासून वाचवायचे आहे. त्या दृष्टीने शिवसेना पदाधिकारी एकोप्याने काम करीत असल्याचे, माजी आमदार वसंत गीते यांनी सांगितले.