Laxman Hake statement : ओबीसीत फूट? माळी समाजाबाबतच्या वक्तव्यामुळे हाके अडचणीत, भुजबळांशी फोनवर चर्चा

Chhagan Bhujbal : ओबीसी नेते लक्ष्मण हाके यांचा सोशल मीडियावर एक व्हिडीओ व्हायरल झाला आहे, ज्यात त्यांनी माळी समाजाबद्दल वादग्रस्त विधान केलं आहे. त्या एका व्हिडिओमुळे हाके यांच्या अडचणी वाढल्या असून ओबीसी समाजातच फूट पडल्याचे पाहायला मिळत आहे. यासंदर्भात अन्न व नागरी पुरवठा मंत्री छगन भुजबळ यांनीही प्रतिक्रिया दिली आहे.

व्हायरल व्हिडिओत लक्ष्मण हाके यांनी माळी समाजाबद्दल वादग्रस्त विधान केले असून, मंत्री भुजबळांवरही टीका केली आहे. त्यादृष्टीने भुजबळांनी लक्ष्मण हाके यांच्याशी आपण त्यासंदर्भात चर्चा केली असल्याची माहिती दिली आहे. हाके यांनी संबंधित प्रकरणात गैरसमज निर्माण केला असून, तेच याबाबत खुलासा करणार आहेत, अशी माहिती भुजबळांनी दिली आहे.

भुजबळ म्हणााले, लक्ष्मण हाके यांचे मला दोन-तीनवेळा फोन आले. काहीतरी गैरसमज झाला असं त्यांनी सांगितलं आहे. याबाबत, हाके स्वत: पुढे येऊन खुलासा करणार आहेत. त्यामुळे, यावर कोणी प्रतिक्रिया देऊ नये, असे मी इतरांना सांगितल्याचे छगन भुजबळ यांनी स्पष्ट केले.

दरम्यान माझा हा व्हिडिओ म्हणजे खोडसाळपणा असल्याचे हाके यांनी म्हटले आहे. हा ओबीसीमध्ये फुट पाडण्याचा हा प्लॅन आहे. ओबीसी बांधवांनी याला बळी पडू नये. असे आवाहन हाकेंनी केलं आहे. छगन भुजबळ यांना मी आदर्श मानतो. माझं आणि त्याचं काय नातं आहे हे भुजबळ साहेबांना माहित आहे. भुजबळ साहेब आणि माझं बोलणं झालं आहे.  मला मॉरल सपोर्ट मिळाला आहे असं हाकेंनी सांगितलं. असे फेक व्हिडिवो पसरवून ओबीसी समाजात फूट पडणार नाही. दोन चार विघ्नसंतोषी लोकं आहेत. मी याबाबत डिपार्टमेंटशी बोललो आहे, वेळ पडली तर त्या चार लोकांबाबत पत्रकारपरिषद घेईन, असेही हाकेंनी सांगितलं आहे.

हाकेंच्या व्हिडीओत नेमंक काय?

ओबीसी समाजाचे नेतृत्व माळी समाजाकडून धनगर समाजाकडे चालले आहे, हे माळी समाजाच्या पोटात दुखतं. भुजबळांनी कोणाला मोठे होऊ दिले नाही, अशा पद्धतीचे वक्तव्य करताना लक्ष्मण हाके यांचा एक व्हिडिओ सोशल मीडियात व्हायरल झाला आहे. या व्हिडिओमुळे हाकेंवर आता माळी समाजातून टीका होत आहे.