विधानसभेत प्रश्‍न उपस्थित होताच अधिकारी, नेत्यांचे धाबे दणाणले

हिंगोणा : येथील दलित वस्ती अंतर्गत ऑनलाइन निविदेत हस्तक्षेप केल्याप्रकरणी आमदार शिरीष चौधरी (Shirish Choudhary) यांनी अधिवेशनात प्रश्‍न केल्यानंतर ग्रामविकास अधिकारी (ZP) यांच्यावर निलंबनाची (Suspension) कारवाई करून चौकशीचे आदेश देण्यात आले. दरम्यान, या गैरप्रकाराबाबत विधानसभेत प्रश्‍न उपस्थित होताच भ्रष्ट अधिकाऱ्यांसह ग्रामपंचायत पदाधिकाऱ्यांचे धाबे दणाणले आहे.

येथील दलित वस्ती निधीचा गैरवापर व ऑनलाइन निविदा प्रक्रियेत हस्तक्षेप करून आर्थिक व्यवहार व काळाबाजार करून दलित वस्तीच्या निधीचा अपहार करू पाहणारे सरपंच, ग्रामसेवक, ग्रामपंचायत सदस्य व त्यांचे नातेवाईक या सर्वांची चौकशी करण्याचे आदेश राज्याचे ग्रामविकासमंत्री हसन मुश्रीफ यांनी विधानसभेत दिले. या प्रकरणात दलित वस्ती योजनेअंतर्गत रस्ता कॉंक्रिटीकरणासाठी दहा लाख तसेच महिला शौचालय उभारणीसाठी सहा लाख निधी दलित वस्तीसाठी मंजूर झाला होता.

दहा लाख रुपये ई टेंडर काढून ई निविदा काढून ग्रामपंचायतीने कुठल्याही वृत्तपत्रात नोटीस, फलकावर किंवा दवंडी न देता तसेच स्थानिक लोकांचा वाद दाखवून ई-टेंडर निविदेला तूर्त स्थगिती दिली आणि आर्थिक लाभापोटी टेडर ई निविदा रिओपन न करता मासिक सभेमध्ये ऑफलाईन टेंडर विनायक अडकमोल यांना देण्यात आले. तसेच ग्रामपंचायतीने कुठलीही वर्कऑर्डर न देता दहा लाख रुपयांचे काम परस्पर सुरू केले. या संदर्भात रिपब्लिकन पार्टी ऑफ इंडियाचे जिल्हाध्यक्ष राजू सूर्यवंशी यांनी गटविकास अधिकारी व तहसीलदार यांना निवेदन देऊन या दलित वस्तीच्या कामात गैरप्रकार व आर्थिक व्यवहार झाल्याची तक्रार केली.

संबंधितांनी ही निविदा रद्दबातल करून आपल्या पद्धतीने काम सुरू केले असल्याचे शासनाच्या निदर्शनास आणून दिले. यावल येथील तहसीलदारांनी आतापर्यंत या संदर्भातील विषयावर काय कारवाई केली, या प्रश्नात स्थानिक ग्रामस्थ मात्र संभ्रमातच आहेत. दरम्यान, आमदार शिरीष चौधरी यांनी हा गैरप्रकार सरपंच, ग्रामविकास अधिकारी, सदस्य यांच्या संगनमताने झाला असल्याची माहिती विधानसभेत ग्रामविकास मंत्री हसन मुश्रीफ यांच्यासमोर मांडून त्यावर ग्रामविकास मंत्री यांनी तत्कालीन ग्रामविकास अधिकारी यांना निलंबित करण्याचा प्रस्ताव पाठविण्यात आला आहे. तसेच यावेळी कारभारात समाविष्ट असलेले सरपंच, ग्रामपंचायत सदस्य तसेच अन्य अधिकारी यांच्या चौकशीचे आदेश दिले आहेत. त्यामुळे यावल तालुक्यातील टाळूवरचे लोणी खाऊ पाहणाऱ्या भ्रष्ट अधिकाऱ्यांसह पदाधिकाऱ्यांचे धाबे दणाणले आहे.

----