Pankaja Munde : माझ्या खात्याला स्वतःचा निधी नाही, माझं काम फक्त.." पंकजा मुंडेंची खदखद बाहेर

Pankaja Munde : पर्यावरण मंत्री पंकजा मुंडे या दोन दिवस नाशिकच्या दौऱ्यावर होत्या. या दौऱ्यादरम्यान त्यांनी माध्यमांशी बोलताना आपल्या खात्यातील निधीवरून खदखद व्यक्त केली आहे. पर्यावरण खात्याला स्वतःचा निधी नाही. दंडाच्या रकमेतून निधी जमा होतो, अशी खंत पंकजा मुंडे यांनी बोलून दाखवली. नाशिक इंडस्ट्रीज अँड मॅन्युफॅक्चरर्स असोसिएशन संघटनेच्या (निमा) वतीने आयोजित कार्यक्रमात त्या बोलत होत्या.

पंकजा मुंडे पुढे म्हणाल्या, सीएसआर फंडातून जसा निधी उभा केला जातो. जसे मंदिर, शिक्षणासाठी पैसे उभे करतात. त्याप्रमाणे पर्यावरण खात्यासाठी निधी उभा करावा. उद्योग विभाग जेव्हा चुका करतात जेव्हा त्यांना दंड पडतो तेव्हा आम्हाला पैसा मिळतो.

प्रदूषण नियंत्रणासाठी जे प्रकल्प उभारावे लागतात. त्यासाठी आमच्याकडे स्वतंत्र निधी उपलब्ध नाही, आम्ही सीईटीपी प्लांट उभारण्यासाठी तयार आहोत, पण त्यासाठी शासनाच्या मदतीची गरज आहे. यासाठी आम्ही मुख्यमंत्र्यांकडे निधी मागण्यासाठी पाठपुरावा करणार आहोत. माझ्या खात्याकडे स्वतःचे बजेट नाही, माझं काम पोलिसासारखं फक्त शिट्टी वाजवायचं आहे अशी खदखद त्यांनी व्यक्त केली.

पुढे त्या म्हणाल्या की, पर्यावरण विभागाची जबाबदारी फक्त महाराष्ट्र प्रदूषण नियंत्रण मंडळापुरती मर्यादित नाही, तर उद्योगांचे हित जपत पर्यावरणाचेही रक्षण करणे गरजेचे आहे. कचऱ्याबाबत सर्वांनी मिळून जबाबदारी स्वीकारणे आवश्यक आहे. दिवसेंदिवस वाढत जाणारा कचरा हा आता जागतिक स्तरावरील गंभीर प्रश्न बनला आहे.

सांडपाणी प्रक्रिया प्रकल्पांवर प्रदूषण नियंत्रण मंडळाने छापे टाकून ते योग्य पद्धतीने कार्यान्वित होत आहेत की नाही, याची तपासणी करावी, अशा सूचनाही त्यांनी यावेळी दिल्या. दरम्यान नाशिक शहरातून वाहणाऱ्या नंदिनी नदीचे प्रदूषण रोखण्यासाठी उपाययोजना करु असे आश्वासन देखील पर्यावरण मंत्री पंकजा मुंडे यांनी यावेळी दिले.

राज्यातील 36 एसटीपीमधून प्रक्रिया न करता पाणी सोडले जात आहे. प्रदूषण नियंत्रण मंडळाच्या पाहणीत तसे उघडकीस आले आहे. त्यामुळे या सर्वांवर कारवाई केली जाणार असल्याचा इशारा त्यांनी दिला.

काल त्यांनी त्र्यंबकेश्वराचे दर्शन घेतले व पूजा केली. तसेच त्र्यंबकेश्वर येथे गेल्या अनेक वर्षांपासून आध्यात्मिक श्रेत्रात काम करणारे, सिद्धिविनायक मानव कल्याण मिशनचे अध्यक्ष तुळशीराम गुट्टे महाराजांच्या स्वसंवेद्या साधनापीठाचे भूमीपूजन केलं.