Rahul Gandhi : काँग्रेसचे नेते व लोकसभेचे विरोधी पक्षनेते राहुल गांधी यांनी स्वातंत्र्यवीर विनायक दामोदर सावरकर यांच्याविषयी केलेल्या कथीत अवमानकारक विधानासंदर्भात नाशिकच्या न्यायालयात गुरुवारी सुनावणी झाली.
सुनावणी वेळी अर्जदार देवेंद्र भुतडा यांच्यातर्फे दिवंगत पंतप्रधान इंदिरा गांधी यांनी सावरकर स्मारकाला लिहिलेले एक पत्र न्यायालयात सादर करण्यात आले, ज्यात त्यांनी सावरकर यांना वीर म्हटल्याचा उल्लेख आहे. भुतडा यांच्यातर्फे अॅड. मनोज पिंगळे यांनी ते पत्र कोर्टात सादर केलं.
दिवंगत पंतप्रधान इंदिरा गांधी यांनी सावरकर स्मारकाला लिहलेल्या या पत्रात सावरकर यांचा वीर असा उल्लेख केला आहे अशी माहिती अॅड. पिंगळे यांनी दिली. तसेच देशाच्या स्वातंत्र्यलढ्यातील सावरकर यांचे योगदान देश कायम लक्षात ठेवील, असा देखील उल्लेख यात आहे.
दरम्यान यावेळी, स्वातंत्र्यवीर सावरकर यांच्याबाबत राहुल गांधी यांनी वेगवेगळ्या तीन जाहीर सभांमधून केलेल्या विधानांचे व्हिडिओ न्यायालयात दाखविण्यात आले. न्यायालयाने 'ते पुरावे म्हणून स्वीकारले असून त्यामुळे राहुल गांधी यांच्या अडचणी वाढण्याची शक्यता आहे. न्या. श्रीमती आर. सी. नरवाडिया यांच्यासमोर सुनावणी झाली. याबाबत १६ ऑक्टोबरला पुढील सुनावणी होईल. दरम्यान याप्रकणात राहुल गांधी यांना न्यायालयाने यापूर्वीच जामीन मंजूर केलेला आहे.
काय आहे प्रकरण ?
राहुल गांधी यांनी भारत जोडो यात्रा काढली होती. या दरम्यान राहुल गांधी यांनी हिंगोली येथे भाषण करताना स्वातंत्र्यवीर सावरकर यांच्या विषयी वादग्रस्त विधान केले होते. त्यांनी सरकारची माफी मागितली आणि ते सरकारकडून आर्थिक मदत घेत होते असा आऱोप व टीका त्यांनी केली होती.
याप्रकरणी 2022 मध्ये नाशिक येथील स्वातंत्र्यवीर सावरकर प्रेमी व निर्भया फाउंडेशनचे अध्यक्ष देवेंद्र भुतडा यांनी नाशिक जिल्हा व सत्र न्यायालयात अर्ज दाखल केला होता. अॅड. मनोज पिंगळे यांच्या मार्फत सावरकरांची बदनामी केल्याप्रकरणी फौजदारी कलम ५०० आणि ५०४ अन्वये दावा दाखल केला होता.
पहिल्या सुनावणीला दूरदृष्यप्रणालीव्दारे राहुल गांधी हजर राहीले त्यांनी आपल्याला आरोप कबुल नसल्याचे सांगितले. परंतु न्यायालयाने त्यांचा जामिन अर्ज मंजूर केला होता. राहुल गांधी यांच्या वतीने नाशिकचे अॅड. जयंत जायभावे यांनी बाजू मांडली होती.
सरकारनामाचे सदस्य व्हा
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read Latest Marathi Political News, Breaking Political News from Maharashtra, India, Pune & Mumbai at Sarkarnama. To Get Live Political Marathi News on Mobile, Download the Sarkarnama Mobile App for Android and IOS. सरकारनामा आता सर्व सोशल मीडिया प्लॅटफॉर्मवर. ताज्या राजकीय घडामोडींसाठी फेसबुक, ट्विटर, इन्स्टाग्राम, शेअर चॅट, टेलिग्रामवर आणि व्हॉट्सॲप आम्हाला फॉलो करा. तसेच, सरकारनामा यूट्यूब चॅनेलला आजच सबस्क्राइब करा.