Seema Hiray Politics: कार्यकर्ते म्हणतात, आमदार सीमा हिरे आणि बडगुजर वादात संकटमोचक गिरीश महाजन यांनीच मध्यस्थी करावी!

Seema Hiray Vs Badgujar News: शिवसेना उद्धव ठाकरे पक्षाचे बडतर्फ उपनेते सुधाकर बडगुजर यांचा भाजप प्रवेश झाला. हा प्रवेश आमदार सीमा हिरे आणि बडगुजर समर्थकांमध्ये वादाची ठिणगी पेटवून गेला. त्यामुळे पश्चिम मतदार संघात भाजपमध्ये दोन गट कार्यरत झाले आहेत.

शहरात आमदार सीमा हिरे आणि सुधाकर बडगुजर या दोन्ही भाजप नेत्यांना तीव्र वाद आहे. या पार्श्वभूमीवर आमदार हिरे यांचा वाढदिवस साजरा होत आहे. या वाढदिवसाला शुभेच्छा देताना हिरे समर्थक माजी नगरसेविका भाग्यश्री ढोमसे आणि राकेश ढोमसे यांनी होर्डिंग लावले आहे. त्यात मंत्री गिरीश महाजन यांचे मोठे छायाचित्र आहे. आमदार हिरे यांनी वाढदिवसाला उपस्थित राहून हिरे बडगुजर वादावर तोडगा काढावा अशी अपेक्षा या निमित्ताने व्यक्त केली आहे.

सुधाकर बडगुजर यांच्या भाजप प्रवेशासाठी जलसंपदा मंत्री गिरीश महाजन आग्रही होते. बडगुजर यांच्या प्रवेशाला आमदार हिरे यांचं १४ माजी नगरसेवक आणि बहुतांशी पदाधिकाऱ्यांनी जाहीरपणे विरोध केला होता. यावेळी बडगुजर यांच्यावर २७ गुन्हे दाखल असून त्यांचा मुंबई बॉम्बस्फोट खटल्यातील आरोपी सलीम कुत्ता यांच्याशी संबंध असल्याचा दावा केला होता.

स्थानिकांचा प्रचंड विरोध असतानाही प्रदेशाध्यक्ष चंद्रशेखर बावनकुळे आणि अन्य नेत्यांनी याबाबत सबुरीचे धोरण घेत प्रवेश पुढे ढकलला होता. मंत्री महाजन यांनी मात्र अट्टहास करून बडगुजर यांना प्रवेश दिला. त्यावर बडगुजर यांच्यावर एवढे प्रेम असेल तर त्यांना जळगाव मधून उमेदवारी द्यावी असा आक्षेप मंत्री महाजन यांच्या बाबत घेण्यात आला होता.

या पार्श्वभूमीवर मंत्री महाजन यांची नाशिकच्या राजकारणात स्थानिक नेते आणि आमदारांना साईड ट्रॅक करण्याची भूमिका तर नाही ना? अशी चर्चा होती. या पार्श्वभूमीवर आमदार हिरे यांच्या वाढदिवसाला मंत्री महाजन यांनी उपस्थित रहावे. आमदार हिरे यांना शुभेच्छा देऊन हिरे- बडगुजर वादावर पडदा टाकावा. तसे झाल्यास पक्षाचा फायदाच होईल, असा हिरे समर्थकांचा मनोदय आहे.

आमदार सीमा हिरे आणि सुधाकर बडगुजर यांच्यातील वाद प्रवेशा आधी होता तेवढाच तीव्र स्वरूपात भाजप प्रवेशानंतरही टिकून आहे. यासंदर्भात बडगुजर समर्थकांनी मध्यंतरी होर्डिंग लावून आमदार हिरे यांच्यावर टीका करून दुखावले होते. हा वाद पोलीस ठाण्यापर्यंत केला होता.

या पार्श्वभूमीवर भारतीय जनता पक्षाने नाशिक महापालिका निवडणुकीसाठी सर्वांसाठी आपली दारे खुली ठेवली आहेत. पक्षाने याबाबतचे सर्व निर्णय गिरीश महाजन यांच्यावर सोपविले आहेत. त्यामुळे भाजपचे इच्छुक आणि माजी नगरसेवक सगळ्यांचीच झोप उडाली आहे. यानिमित्ताने गटबाजी उफाळून येण्याची शक्यता आहे. त्यावर हिरे -बडगुजर तहाचा पर्याय मंत्री महाजन स्वीकारणार का याची उत्सुकता आहे.

-----