Nashik News : राष्ट्रवादी काँग्रेस शरदचंद्र पवार पक्षाचे रविवारी शहरातील आडगाव परिसरातील स्वामी नारायण बँकवेट हॉल येथे कार्यकर्ता शिबीर पार पडले. त्यानंतर आज नाशिकमध्ये गोल्फ क्लब मैदान ते जिल्हाधिकारी कार्यालयापर्यंत भव्य जन आक्रोश मोर्चा काढण्यात येणार आहे. शरद पवार यांच्या नेतृत्वात हा मोर्चा काढला जाणार आहे. त्यासाठी पक्षाच्या खासदार सुप्रिया सुळे देखील नाशिकमध्ये आलेल्या आहेत.
हा मोर्चा काढण्यापूर्वी खासदार सुप्रिया सुळे यांनी त्र्यंबकेश्वर येथे जाऊन त्र्यंबकेश्वराचे दर्शन घेतले. यावेळी त्यांनी नाशिक-त्र्यंबकेश्वर रस्त्यांवर पडलेल्या खड्ड्यांकडे राज्य सरकारने लक्ष द्यावे, अशी एक्स पोस्ट केली आहे. सार्वजनिक बांधकाम मंत्री शिवेंद्रराजे भोसले यांना ही पोस्ट टॅग करत त्यांनी लक्ष वेधले आहे.
नाशिक ते त्र्यंबकेश्वर या राज्य मार्गाची अतिशय वाईट अवस्था आहे. जागोजागी खड्डे पडले असून या रस्त्यावरुन प्रवास करणे जिकीरीचे झाले आहे. श्री क्षेत्र त्र्यंबकेश्वर हे असंख्य भाविकांचे श्रद्धास्थान आहे. या मार्गावरुन भाविकांची ये-जा असते. सध्या रस्त्याची अवस्था पाहता हा रस्ता वाहतूकीच्या दृष्टीने सुरक्षित आणि सोयीचा देखील राहिलेला नाही. माझी राज्याचे सार्वजनिक बांधकाम मंत्री महोदयांना विनंती आहे की, कृपया आपण हा रस्ता तातडीने दुरुस्त करावा असं सुप्रिया सुळे यांनी 'एक्स' पोस्ट मध्ये म्हटलं आहे.
दरम्यान सुप्रिया सुळे यांनी आज सकाळी (दि. १५) त्र्यंबकेश्वर येथे भेट देत त्र्यंबकराजाचे दर्शन घेतले. यावेळी त्यांच्या हस्ते मंदिरात पूजा व आरती करण्यात आली. यापूर्वी शरद पवार हे केंद्रात व राज्यात मंत्री असताना त्यांनी त्र्यंबकेश्वरमध्ये दोन ते तीन वेळा भेट दिली होती. परंतु, दौरा आणि प्रोटोकॉलमुळे त्यांच्याकडून दर्शनाचा योग साधला गेला नव्हता. पंरतु आज त्यांच्या कन्या सुप्रिया सुळे यांनी त्र्यंबकराजाचे दर्शन घेतले.
दरम्यान त्यानंतर आजच्या शेतकरी आक्रोश मोर्चाला गोल्फ क्लब मैदान येथून सुरुवात झाली. शेतकरी कर्जमाफी, आत्महत्या, पीक विमा, कांदा निर्यातबंदी, अतिवृष्टीमुळे झालेले नुकसान, लाडक्या बहिणींना २१०० रुपये आणि युवांना नोकरी अशा विविध मुद्द्यांवर सरकारला प्रश्न करत राष्ट्रवादी काँग्रेस शरदचंद्र पवार पक्षाने आजचा मोर्चा काढला आहे. जिल्हाधिकारी कार्यालयावर हा मोर्चा धडकणार आहे. शेतकरी बांधव मोठ्या संख्येने या मोर्चात सहभागी झाले आहेत.
सरकारनामाचे सदस्य व्हा
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read Latest Marathi Political News, Breaking Political News from Maharashtra, India, Pune & Mumbai at Sarkarnama. To Get Live Political Marathi News on Mobile, Download the Sarkarnama Mobile App for Android and IOS. सरकारनामा आता सर्व सोशल मीडिया प्लॅटफॉर्मवर. ताज्या राजकीय घडामोडींसाठी फेसबुक, ट्विटर, इन्स्टाग्राम, शेअर चॅट, टेलिग्रामवर आणि व्हॉट्सॲप आम्हाला फॉलो करा. तसेच, सरकारनामा यूट्यूब चॅनेलला आजच सबस्क्राइब करा.