Trible Reservation : आमदारांनो राजीनामे देऊन घरी बसा!

Nashik Trible march News : आरक्षण वाचविण्यासाठी आज आदिवासी समाजाने नाशिकमध्ये मोठे शक्तिप्रदर्शन करीत जिल्हाधिकारी कार्यालयापुढे धरणे धरले. या वेळी नेत्यांनी आमदारांना आरक्षण वाचवता येत नसेल, तर राजीनामे देऊन घरी बसा, असा इशारा दिला. (Trible community demonstrate there strength in Nashik against Dhangar community reservation)

धनगर समाजाने आदिवासी (Trible community) जमाती वर्गात आरक्षण मागितल्याने त्याला विरोध वाढतच चालला आहे. आदिवासी विकास परिषदेने आज राज्य सरकारच्या (Maharashtra) विरोधात नाशिकमध्ये (Nashik) हजारो आदिवासींसह शक्तिप्रदर्शन केले.

अखिल भारतीय आदिवासी विकास परिषदेच्या पुढाकाराने हा मोर्चा काढण्यात आला. जिल्ह्याच्या विविध भागातून हजारो आदिवासी नागरिक या मोर्चात सहभागी होण्यासाठी शहरात जमले होते. पंचवटी भागातील तपोवन येथून मोर्चाला सुरुवात झाली. हा मोर्चा शहरातील विविध मार्गाने जिल्हाधिकारी कार्यालयापुढे जमले होते. या वेळी आदिवासींनी घोषणांनी हा परिसर दणाणून सोडला.

या मोर्चाचे नेतृत्व आदिवासी विकास परिषदेने केले. त्यात मार्क्सवादी कम्युनिस्ट पक्षाचे नेते जे. पी. गावित, भाजपचे माजी खासदार हरिश्चंद्र चव्हाण, राष्ट्रवादी काँग्रेसचे आमदार नितीन पवार या तीन नेत्यांनी आयुष्यभर एकमेकांच्या विरोधात राजकारण केले. एकमेकांचे तोंडही न पाहणारे हे नेते अनुसूचित जाती, जमातीच्या आरक्षणातून धनगर समाजाला आरक्षण देऊ नये, कंत्राटी नोकर भरतीचा अध्यादेश रद्द करावा यांसह विविध मागण्यांसाठी एकत्र आले होते.

या वेळी विधान परिषदेचे उपाध्यक्ष नरहरी झिरवाळ, राष्ट्रवादी काँग्रेसचे आमदार किरण महामटे, आमदार हिरामण खोसकर, मंजुळा गावित, माजी आमदार धनराज महाले आदींसह विविध लोकप्रतिनिधी मोर्चात सहभागी झाले होते. समितीचे राम चौरे, संजय दाभाडे, शिवाजी ढवळे आदींसह विविध पदाधिकारी, सरपंच व लोकप्रतिनिधी सहभागी झाले होते.