BJP News : कोंडून ठेवलेल्या भाजप बंडखोराची शेवटच्या क्षणी सुटका; पळत जाऊन अर्ज मागे; आमदारांनी काय दिले आश्वासन?

Nagpur BJP News : भाजपने नागपूरमध्ये एकाच जागेसाठी दोन उमेदवारांना एबी फॉर्म दिल्याने मोठा असंतोष उसळून आला आहे. प्रभाग क्रमांक 13 मधून भाजपने किसन गावंडे आणि विजय होले या दोघांना एबी फॉर्म देण्यात आला होता. यापैकी होले यांचा अर्ज स्वीकृत झाला आहे. गावंडे यांच्यावर उमेदवारी मागे घेण्यासाठी नेते दबाव टाकत असल्याचे बघून कार्यकर्त्यांनी त्यांना घरात कोंडून ठेवले होते. यावरून प्रचंड गदारोळ उडाल्यानंतर आमदार परिणय फुके आणि माजी आमदार सुधाकर देशमुख यांच्या माध्यमातून गावंडे यांची कार्यकर्त्यांच्या गराड्यातून सुटका करण्यात आल्यानंतर गावंडेंची उमेदवारी मागे घेण्यास भाजपला यश आले आहे.

किसन गावंडे हे देशमुख यांचे कट्टर समर्थक आहे. ते पश्चिम मंडळाचे अध्यक्ष होते. महापालिकेच्या निवडणुकीत प्रबळ दावेदार असतानाही भाजपने होले यांच्या नावावर शिक्कमोर्तब केले. त्यामुळे भाजपचे कार्यकर्ते चांगलेच आक्रमक झाले होते. उमेदवारी मागे घेऊ नये यासाठी त्यांना एका घरात कोंडून ठेवण्यात आले होते. आमदार परिणय फुके यांनी गावंडे यांना मोठी जबाबदारी देण्यात येईल, झालेला अन्याय दूर केला जाईल. असे आश्वासन देऊन कार्यकर्त्यांचा रोष शांत केला.

नागपूरमध्ये एकूण 6 प्रभागांतील एका जागेवर भाजपने दोघांना एबी फॉर्म दिला आहे. याशिवाय अनेक बंडखोरांनी रिंगणात उडी घेतली आहे. बाहेरच्यांना दिलेल्या उमेदवारीवरून भाजपमध्ये मोठा गोंधळ निर्माण झाला आहे. 151 जागेसाठी 1800 कार्यकर्त्यांनी उमेदवारी मागितली होती. उमेदवारांची नावे आधीच जाहीर केली तर मोठा गोंधळ उडण्याची शक्यता वर्तविली जात होती. याची खबरदारी भाजपने आधीच घेतली होती.

केंद्रीयमंत्री नितीन गडकरी यांच्या कार्यालयात बोलवून प्रत्येकाच्या हाती एबी फॉर्म दिला होता. उमेदवारी अर्ज दाखल करण्याची मुदत संपल्यानंतर अधिकृत उमेदवारांची नावे भाजपने जाहीर केली होती. सर्वाधिक चुरस व प्रबळ दावेदार असलेल्या प्रभागांमध्ये दोघांना एबी फॉर्म देण्यात आले होते. मात्र ज्या उमेदवाराने आधी अर्ज भरला त्याचा फॉर्म स्वीकारण्यात आला आहे. दुसऱ्या उमेदवाराचा एबी फॉर्म रद्द झाला आहे.