
Chnadrapur News : सुधीर मुनगंटीवार आणि किशोर जोरगेवार या 2 भाजप आमदारांच्या वादात अडकलेले चंद्रपूरचे दोन्ही भाजप जिल्हाध्यक्ष अखेर जाहीर झाले आहेत. यात चंद्रपूर शहराध्यक्षपदी किशोर जोरगेवार यांचे निकटवर्तीय सुभाष कासमगुट्टवार यांची नियुक्ती झाली आहे. तर चंद्रपूर ग्रामीणच्या जिल्हाध्यक्षपदी सुधीर मुनगंटीवार यांचे समर्थक हरीष शर्मा यांची नियुक्ती कायम ठेवण्यात आली आहे.
भाजपने यापूर्वी 13 मे रोजी 78 पैकी 58 जिल्हाध्यक्षांची यादी जाहीर केली होती. तर जिथे स्थानिक पातळीवर वाद आहेत, दोन नेत्यांमधील मतभेद आहेत, आगामी निवडणुकीची समीकरणांची गोळाबेरीज व्हायची आहे अशा 22 ठिकाणचे जिल्हाध्यक्ष मागे ठेवले होते. अखेरीस आज (शनिवारी) दुपारी उर्वरित 22 जिल्हाध्यक्षांची नावे जाहीर झाली आहेत.
या नियुक्तीनंतर किशोर जोरगेवार मुनगंटीवार यांच्यावर वरचढ ठरल्याचे स्पष्टपणे दिसून येत आहे. हरीश शर्मा यांची ग्रामीणचे जिल्हाध्यक्ष म्हणून नियुक्ती कायम ठेवण्यात आली आहे. पण यापूर्वी शहरचे जिल्हाध्यक्ष असलेल्या राहुल पावडे यांचा कार्यकाळ शिल्लक असतानाही यांना नारळ देण्यात आला आहे. पावडेही मुनगंटीवार समर्थक होते. आता आगामी महानगरपालिका निवडणुकीच्या दृष्टीने चंद्रपूर शहरचे जिल्हाध्यक्ष पद आमदार जोरगेवार यांच्यासाठी महत्त्वाचे राहणार आहे.
सुधीर मुनगंटीवर यांचे आजवर चंद्रपूर जिल्ह्यात वर्चस्व होते. कोणाला शहराध्यक्ष, महापालिकेत कोण उमेदवार असणार? नगपालिकेत कोण उमेदवार असणार? कोण महापौर आणि कोण नगराध्यक्ष असणार असे सगळे निर्णय मुनगंटीवारच घ्यायचे. त्यांचा शब्द भाजपात अंतिम मानला जात होता. आता मात्र परिस्थिती बदलली आहे. ज्या जोरगेवार यांना मुनगंटीवार यांनी पक्षात घेण्यास विरोध केला होता तेच जोरगेवार विधानसभेला मोठ्या फरकाने निवडून आले. आता जोरगेवारांचा जिल्ह्यात चांगलाच जोर वाढला आहे.
जोरगेवार यांच्या मदतीला माजी केंद्रीय मंत्री हंसराज अहीर, आमदार बंटी भांगडिया, माजी मंत्री शोभाताई फडणवीस हेसुद्धा धावून आले. सर्वांनाच आपले जुने राजकीय हिशेब फेडायचे आहेत. यापूर्वी मुनगंटीवार यांनी सुचवलेल्या मंडळ अध्यक्षांच्या नावांना जोरगेवार यांनी विरोध दर्शवला होता. त्यामुळे अगदीच किरकोळ समजल्या जाणाऱ्या मंडळ अध्यक्षांची निवडही प्रतिष्ठेची झाली होती. त्यापाठोपाठ शहर आणि ग्रामीणच्या जिल्हाध्यक्षपदी आपला पसंतीचा माणूस असावा, यासाठी दोघांनीही मोर्चेबांधणी केली होती.
राहुल पावडे यांची जिल्हाध्यक्षपदावरील नियुक्ती कायम रहावी यासाठी मुनगंटीवार आग्रही होते. तर आमदार जोरगेवार यांनी सुभाष कासमगुट्टवार, दशरथसिंग ठाकूर आणि डॉ. मंगेश गुलवाडे यांच्यासाठी फिल्डिंग लावली होती. तर ग्रामीणसाठीही हरीश शर्मा यांची पुनर्नियुक्ती व्हावी यासाठी मुनगंटीवार यांनी ताकद पणाला लावली होती. पण इथेही ब्रह्मपुरीचे क्रिष्णा सहारे, विवेक बाढे, नामदेव डाहुले असे जोरगेवार समर्थक इच्छुक होते.
ही दोन्ही पदे हिसकावून आमदार मुनगंटीवारांचे आजवरचे संघटनेवरचे वर्चस्वच काढून घेण्याचा प्रयत्न जोरगेवार यांचा होता. पण भाजपअंतर्गत गटातटाचे राजकारण बघता आमदार मुनगंटीवार गटाला ग्रामीण आणि जोरगेवार यांच्या गटाला शहराचे जिल्हाध्यक्षपद देण्यात आले आहे. यात पहिल्यांदाच मुनगंटीवार गटाव्यतिरिक्त गटाकडे जिल्हाध्यक्षपद गेले आहे.
सरकारनामाचे सदस्य व्हा
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read Latest Marathi Political News, Breaking Political News from Maharashtra, India, Pune & Mumbai at Sarkarnama. To Get Live Political Marathi News on Mobile, Download the Sarkarnama Mobile App for Android and IOS. सरकारनामा आता सर्व सोशल मीडिया प्लॅटफॉर्मवर. ताज्या राजकीय घडामोडींसाठी फेसबुक, ट्विटर, इन्स्टाग्राम, शेअर चॅट, टेलिग्रामवर आणि व्हॉट्सॲप आम्हाला फॉलो करा. तसेच, सरकारनामा यूट्यूब चॅनेलला आजच सबस्क्राइब करा.